Almaty metrosynda tólem júıesindegi aqaý kesirinen kezek paıda boldy

Qala turǵyndary jolaqyny tóleý kezinde qıyndyqtarǵa tap bolǵanyn habarlady.

Atap aıtqanda, QR-kod arqyly tólem jasaýǵa árekettengen kezde qosymshada qate týraly habarlama shyqqan.

Almaty metropolıteni ókilderiniń túsindirýinshe, jolaýshylardyń kezekke turýyna «Onay» tólem júıesindegi ýaqytsha aqaý sebep bolǵan.

— Saǵat 06:30–dan bastap barlyq stantsııada «Onay» júıesiniń QR-kody arqyly tólem ýaqytsha istemedi. Alaıda tólemniń basqa tásilderi shtattyq rejımde jumys istedi. Jolaýshylar «Onay» kólik kartalaryn, bank kartalaryn, Apple Pay, Samsung Pay jáne qaǵaz QR-bıletterdi kedergisiz paıdalana aldy, — dep habarlady metropolıtenniń baspasóz qyzmeti.

Metropolıten málimetinshe, basqa tólem servısteri jumys istep turdy.

Saǵat 09:30–da QR-«Onay» tólem júıesindegi aqaý tolyq joıyldy. Qazir servıs shtattyq rejımde jumys istep tur.

Aıta keteıik, Almaty metrosynda bomba baryn aıtqan áıel ustalǵan edi.