Almaty metrosynda kolledj stýdentinen oq-dári tabyldy
ALMATY. KAZINFORM — Almaty metrosynda kámeletke tolmaǵan jolaýshydan jaýyngerlik bolýy múmkin úsh oq tabyldy.
Polıtsııanyń habarlaýynsha, «Raıymbek batyr» metro stantsııasynda Metropolıtendegi polıtsııa basqarmasynyń qyzmetkerleri tekserý barysynda qaladaǵy kolledjderdiń biriniń stýdentin ustady.
Jeke tintý kezinde onyń janynan Kalashnıkov avtomatyna tıesili bolýy múmkin úsh oq tabylǵan.
— Oqıǵa ornyna Jetisý aýdandyq polıtsııa basqarmasynyń jedel-tergeý toby dereý keldi. Tabylǵan oq-dáriler tárkilenip, tıisti saraptamaǵa joldandy, — delingen habarlamada.
Bul derek boıynsha qylmystyq is qozǵaldy. Qazirgi ýaqytta oq-dárilerdiń qaıdan shyqqanyn jáne oqıǵanyń barlyq mán-jaıyn anyqtaýǵa baǵyttalǵan tergeý amaldary júrgizilip jatyr.
Polıtsııa qarý men oq-dárilerdi zańsyz saqtaý, alyp júrý jáne tasymaldaý qylmystyq jaýapkershilikke ákep soǵatynyn eskertti.
Eske salaıyq, buǵan deıin Almatyda drıft jasaǵan kezekti júrgizýshiniń kóligi aıyppul turaǵyna qoıylǵanyn habarlaǵanbyz.
