Almaty metrosynda bomba baryn aıtqan áıel ustaldy
ALMATY. KAZINFORM — Almaty turǵyny «Raıymbek batyr» metro stantsııasynda jarylǵysh qurylǵy bar ekenin aıtqan.
Áleýmettik jelilerde «Raıymbek batyr» stantsııasynyń jabylǵany týraly aqparat tarady. Jolaýshylarǵa saparyn avtobýstarmen jalǵastyrý usynylǵan. Bul jaǵdaı qala turǵyndarynyń arasynda suraq týǵyzdy.
Polıtsııanyń málimetinshe, metro qyzmetkerlerine bir áıel jarylǵysh qurylǵy bar ekenin habarlaǵan. Ol dereý ustaldy.
— Stantsııada tıisti mamandardyń qatysýymen komıssııalyq tekseris júrgizildi. Nátıjesinde jarylǵysh qurylǵylar men kúdikti zattar anyqtalǵan joq, — dep habarlady Almaty polıtsııa departamentiniń baspasóz qyzmeti.
Aldyn ala málimet boıynsha, áıel psıhıkalyq densaýlyq ortalyǵynda esepte turady. Qazir tekseris júrgizilip jatyr. Onyń qorytyndysy boıynsha áıeldiń áreketine quqyqtyq baǵa beriledi.
Polıtsııa metropolıtenniń shtattyq rejımde jumys istep turǵanyn jáne jaǵdaı quqyq qorǵaý organdarynyń baqylaýynda ekenin atap ótti.
Almatyda bomba týraly jalǵan habarlamalar jıilep ketti. Buǵan deıin Dostyk Plaza saýda ortalyǵynda bomba bar degen habarlama tarap, adamdar evakýatsııalandy.
Sondaı-aq 20 qazanda UIB jáne taǵy birneshe ýnıversıtette jarylǵysh zattyń bar-joǵy tekserildi.
