Almaty metrosynda 2026 jyly týrnıketter jańartylady
ALMATY. KAZINFORM — Almaty metrosynyń beketterinde týrnıketter jańartylyp, jańa elektropoıyzdar alynady.
Almatyda negizgi kólik quraly retinde metropolıtendi qoldanatyn jolaýshylar sany artyp keledi. Mysaly, qyrkúıek jáne qazan aıynda metronyń jolaýshylar sany boıynsha rekord eki ret jańardy.
Ásirese, tańǵy jáne keshki ýaqytta jolaýshylar aǵyny tym kóp bolýynan metro beketteriniń kireberisinde adamdar toby jınalyp, keptelis qalyptasatyn bolǵan.
Metropolıten ákimshiligi jolaýshylarǵa qyzmet kórsetý sapasyn arttyrý maqsatynda qajetti sharalardy qabyldap jatqanyn habarlady. Mekeme málimetinshe, 2024 jyldyń maýsym aıynda metropolıtende bet pishini arqyly tólem jasaý júıesi — FacePay jobasy iske qosyldy. Al 2026 jyldyń birinshi toqsanynda barlyq stantsııalarda týrnıketterdi jańǵyrtý jumystary júrgiziledi.
— Bul jumystar aıasynda týrnıketter bank kartalary, Apple Pay, Google Pay jáne Samsung Pay arqyly tólem qabyldaı alatyn janaspaıtyn tólem júıesimen jabdyqtalady. Modernızatsııanyń negizgi maqsaty — týrnıketterdiń barlyq tólem túrlerin qabyldaýyn qamtamasyz etý, — dep habarlady mekeme.
Sondaı-aq qarbalas ýaqytta poıyzdardyń jıiligin arttyrý úshin jańa 10 elektropoıyz satyp alý josparlanǵan.
Eske salaıyq, buǵan deıin Almaty metrosynyń barlyq beketinde platformalyq esikter ornatylatynyn jazǵanbyz.