Almaty metrosyn jarty kúnde 40 myńǵa jýyq jolaýshy qoldanǵan
ALMATY. KAZINFORM – Búgin, 1 qyrkúıekte Almaty metrosynda uzyn-sonar kezek baıqaldy.
Metropolıten beketteriniń kireberisindegi adamdar kezeginiń beınejazbalary áleýmettik jelide tarap jatyr. Kadrlardan jolaýshylar kóptiginen poıyzdarǵa kirip-shyǵý qıyndaǵanyn kórýge bolady.
Sondaı beınejazbalardyń biri Baýyrjan Momyshuly beketinde túsirilgen.
Almaty metropolıteni atalǵan jaǵdaıǵa qatysty túsinikteme berdi.
Resmı málimetke sáıkes, 1 qyrkúıekte túske deıin metro poıyzdary 40 myńǵa jýyq jolaýshyny tasymaldaǵan.
– Jańa oqý jylynyń alǵashqy kúninde Almaty metrosynda jolaýshylar aǵyny artty. 1 qyrkúıek kúni saǵat 06:20 dan 15:00-ge deıin 40 myńǵa jýyq jolaýshy tasymaldandy. Oqý jylynyń bastalýyna baılanysty metro jumysy kúsheıtilgen rejımde uıymdastyryldy. Tańǵy jáne keshki qarbalas ýaqytta poıyzdar arasyndaǵy ınterval 3 mınýt 27 sekýndqa deıin qysqartyldy, – dep habarlady metro baspasóz qyzmeti.
Eske salaıyq, buǵan deıin Almaty ákimdigi qyrkúıekte kólik júktemesiniń artýyna baılanysty birqatar shara qabyldanǵanyn atap ótti.
