Almaty metrosy jańa rekord ornatty

ALMATY. KAZINFORM — Almaty metrosy keshe, «Qaırat» — «Real Madrıd» matchy ótken kúni 142 932 jolaýshy tasymaldady.

— Jańa rekord! 30 qyrkúıek kúni «Qaırat» pen «Real Madrıd» arasyndaǵy oıynda Almaty metrosynda jolaýshylar aǵyny buryn-sońdy bolmaǵan deńgeıge jetti. Sol kúni metropolıten 142 932 jolaýshyny tasymaldady — bul tarıhtaǵy eń joǵarǵy táýliktik kórsetkish, — delingen metropolıtenniń baspasóz qyzmeti taratqan aqparatta.

Match kúni metronyń jumys ýaqyty 01:00–ge deıin uzartyldy.

 

Eske salaıyq, Almatydaǵy oıynǵa 5 myńnan astam sheteldik týrıst keldi.

Qazaqstannyń ár óńirinen kelgen jankúıerlermen qosqanda, kórermenderdiń jalpy sany ondaǵan myń adamǵa jetti.

Aıta keteıik, buǵan deıin, 2 qyrkúıekte de Almaty metropolıteninde rekord tirkelgen edi. Ol kúni jumys ýaqyty ishinde metromen 117 myń jolaýshy qatynaǵan.