Almaty metrosy poıyzdardyń uzaq ıntervalyna qatysty túsinikteme berdi

ALMATY. KAZINFORM — Almaty turǵyndary qalalyq metrodaǵy poıyzdardyń jıiligine baılanysty shaǵym bildirdi. 

Áleýmettik jelide jyldam kóliktiń ıntervaly uzaryp ketkeni týraly jazbalar kóbeıgen.

— Almaty metrosyndaǵy 10 mınýttyq ınterval — aqylǵa syımaıdy. Tipti demalys kúnderi de solaı. Metronyń tartymdylyǵy — oǵan eshteńeniń áser etpeıtindiginde edi, biraq mundaı uzaq ınterval jer astyna túsýdiń mánin joıady, — dep jazdy Nıkıta Baev.

Almaty metropolıteni óziniń jelidegi paraqshasynda poıyzdardyń júrý jıiligine baılanysty túsinikteme berdi.

— Metro — bul senimdi jáne qaýipsiz kólik júıesi, ol keptelis pen aýa raıynyń jaǵdaıyna qaramastan jumys isteıdi. Onyń negizgi artyqshylyǵy — turaqty qozǵalys, biraq poıyzdar sany jelide jolaýshylar aǵynyna baılanysty bolady, — delingen jazbada.

Metropolıten málimetinshe, jumys kúnderi tańerteń (06:20–09:30) jáne keshke (16:30–21:00) jelide 9 poıyz qatynap, ınterval 6 mınýt 54 sekýnd bolady. Jolaýshylar aǵyny kúrt artatyn ýaqytta taǵy 4 poıyz qosylyp, jelide barlyǵy 13 poıyz júredi. Al ınterval 3 mınýt 27 sekýndqa qysqarady.

— Osy ýaqytta platformalar eń kóp jolaýshyny qabyldaıdy, sondyqtan poıyzdardyń qozǵalysy barynsha jıi uıymdastyrylady. Saǵat 09:30–dan 16:30–ǵa deıin jáne saǵat 21:00–den stantsııalar jabylǵanǵa deıin jolaýshylar aǵyny edáýir tómendeıdi. Statıstıka boıynsha bul ýaqyttarda jolaýshylar sany birneshe ese az. Sondyqtan jelide tek 6 poıyz jumys isteıdi, al poıyzdar arasyndaǵy ınterval 10 mınýt 20 sekýndqa deıin uzartylady, — dep túsindirdi metro baspasóz qyzmeti.

Sondaı-aq metropolıten demalys kúnderi de jolaýshylar aǵyny az bolǵandyqtan, poıyzdar ıntervaly uzartylatynyn atap ótti.

Eske salaıyq, buǵan deıin Qalqaman metro beketine deıingi týnnel tolyq qazylǵanyn jazǵanbyz.