Almaty metrosy «Baraholka» arqyly Alataý qalasyna deıin uzarýy múmkin

ALMATY. KAZINFORM — Almaty metropolıteniniń úshinshi jelisi Alataý qalasynan «Mızam» bazary arqyly qazirgi «Saıran» metro beketine deıin salynýy múmkin. 

Memlekettik satyp alý saıtynda Almaty metropolıteniniń úshinshi jelisiniń tehnıkalyq-ekonomıkalyq negizdemesin daıyndaýǵa eki habarlandyrý jarııalandy. Onyń biri — Alataý qalasynan «Mızam» bazaryna deıingi aralyq, ekinshisi — «Mızam» bazarynan «Saıran» beketine deıingi aralyq. 

Tapsyrys berýshi — Almaty qalasy Qalalyq mobıldilik basqarmasy. Jobalaýǵa 2025 jyldyń 18 sáýirindegi Almaty qalasy ákimdiginiń qaýlysy negiz bolǵan.

Birinshi joba boıynsha qujatty ázirleýge 1,3 mlrd teńge (1 351 054 778), al «Mızam» bazarynan «Saıran» beketine deıingi qurylystyń qujaty boıynsha 896 mln teńge (896 459 961) bólingen. Eki qujat boıynsha da ashyq konkýrs bıyl 11-18 maýsym aralyǵynda ótedi. Jumystardy ótkizý merzimi — 2026 jylǵy 31 mamyr.

Memlekettik satyp alý saıtynda jarııalanǵan málimetke sáıkes, Alataý qalasynan «Mızam» bazaryna deıingi aralyqta 7 beket bolady. Olar:

— № 1 beket — «Gate City» janynda, «Soltústik» kólik torabynyń aýmaǵynda;

№ 2 beket — «Kemel» shaǵyn aýdanynyń janynda;

— № 3 beket — Soltústik aınalym joly men Boraldaı kóshesi qıylysynyń aýmaǵynda;

— № 4 beket — Soltústik aınalym joly boıynda, Saýda kóshesimen qıylysynda ornalasqan;

— № 5 beket — Soltústik aınalym joly boıynda, áskerı bólim janynda ornalasqan;

— № 6 beket «Kenjehan» bazarynyń janynda;

— № 7 beket — «Mızam» bazarynyń aýmaǵynda;

— Depoǵa deıingi jeli, elektrdeposy — «Soltústik» kólik torabynyń soltústiginde.

Al «Mızam» bazarynan «Saıran» beketine deıingi aralyqta 5 beket salynady. Olar kelesi mekenjaılarda ornalasady:

— № 1 beket — Soltústik aınalym joly boıynda, «ıAlıan» bazarynyń aýmaǵynda;

— № 2 beket — Soltústik aınalym joly boıynda «Adem» saýda úıi aýmaǵynda;

— № 3 beket — Raıymbek danǵyly men Tilendıev kóshesiniń qıylysynda;

— № 4 beket — Tóle bı kóshesi men Tilendıev kóshesiniń qıylysynda;

— № 5 beket — Abaı danǵyly men Tilendıev kóshesiniń qıylysynda (birinshi jelige ótý jaǵyn uıymdastyrý).

Sonymen qatar eki joba boıynsha qurylys alańdarynyń oryndaryn anyqtaý, jolaýshylar aǵynyn boljaý, qurylys kezinde qazaqstandyq

óndirýshilerdiń qurylys materıaldaryn paıdalanýdy qarastyrý, arhıtektýralyq sheshimderdi anyqtaý, qorshaǵan ortany qorǵaý sharalaryn

qarastyrý, qozǵalysy shekteýli adamdar úshin qoljetimdilikti qamtamasyz etý jáne ózge de talaptar qoıylǵan.

Eske salaıyq, buǵan deıin Almatyda jańa metro beketin salý úshin jer ýchaskeleri satyp alynatynyn jazǵanbyz.