Almaty metropolıteni qos fýnktsııaly jańa qorshaýlardy synaqtan ótkizip jatyr

ALMATY. KAZINFORM — Almaty metrosynda ornatylǵan ýaqytsha qorshaýlardyń jel júktemesine  tózimdiligi tekserilip jatyr. 

Almaty metropolıtetiniń baspasóz qyzmeti málim etkendeı, «Raıymbek batyr» beketinde  metropolıtenniń zamanaýı qaýipsizdik standarttaryna sáıkes keletin jańa ýaqytsha qorshaýlar ornatyldy. Olar eki negizgi qyzmet atqarady: jolaýshylar úshin qorǵanys quraly jáne  jarnamalyq qurylym retinde paıdalanylady. 

Qazir bul qorshaýlardyń jel júktemesine tózimdiligi tekserilip jatyr. Barlyq qajetti synaqtan  ótkennen keıin osyndaı qorshaýlar metronyń basqa beketterinde de ornatylady. Sonymen  qatar metropolıten ókilderi buryn ornatylǵan temir qorshaýlardyń da tekserilip jatqanyn, qajet bolǵan jaǵdaıda olardyń alynatynyn atap ótti. 

Eske salaıyq, byltyr 10 jeltoqsan kúni Almaty metrosynda 26 jastaǵy zaǵıp jolaýshy relske qulap, mert boldy. Keıin qaıǵyly oqıǵanyń beınejazbasy jelide tarady. Onda 26 jastaǵy jigittiń vagondar arasyndaǵy ashyq tustan relske qulap ketkenin kórýge bolady. 

Almaty ákimi Erbolat Dosaev qaıǵyly jaǵdaıdan keıin Almaty metrosynda ne ózgergenin aıtqan edi. 

Osyǵan deıin Almaty metrosynyń beketterinde qaýipsizdik qorshaýlary ornatyla bastaǵany týraly jazǵan bolatynbyz. 

Keıin Almaty metropolıteniniń dırektory Almasbek Orynbekov ýaqytsha ornatylyp jatqan qorshaýlarǵa qatysty túsinik berdi. 

Aıtýynsha, qorshaýlar vagondardyń arasyndaǵy keńistikti shekteý úshin ornatylady jáne metropolıtenniń paıdalaný shyǵyny esebinen júzege asyrylady, ıaǵnı bıýdjet qarajaty tartylmaıdy.