Almaty men Jetisý oblystarynan esirtki zerthanalary tabyldy - ІІM

ALMATY. KAZINFORM - Almaty jáne Jetisý oblystarynda esirtki zerthanalary joıyldy, – dep habarlaıdy Polisia.kz.

Іshki ister mınıstrligi 1Zań men Tártip1 qaǵıdaty negizinde jumystardy júrgizip jatyr.

Esirtki qylmysyna qarsy is-qımyl qyzmetkerleri Taldyqorǵan qalasynda jáne Almaty oblysynyń Qarasaı aýdanynda sıntetıkalyq esirtki óndiretin eki zerthanany joıdy.

Atap aıtqanda, Taldyqorǵan qalasynyń shet aımaǵyndaǵy jeke úılerdiń birinde sıntetıkalyq esirtkini iri kólemde daıyndaýdy uıymdastyrǵan 30 jastaǵy kúdikti esirtki daıyndaý barysynda qolǵa tústi. Oqıǵa ornynan 20 keli mefedron, konstrýktorlyq jabdyqtar, magnıtti aralastyrǵyshtar, hımııalyq reagentteri bar plastık kanıstrler jáne 800 keli prekýrsor tárkilendi.

Qarasaı aýdanynda esirtki óndirýge qatysy bar 25 jastaǵy turǵyn jáne onyń birge turatyn seriktesi ustaldy. Turǵyn úıden 1,5 keli mefedron, zerthanalyq jabdyqtar jáne 20 lıtr prekýrsor alyndy.

Atalǵan derekter boıynsha Qylmystyq Kodekstiń 297-1-baby 3-bóligimen sotqa deıingi tergep-tekserý bastaldy.

Esirtki óndirisin uıymdastyrýshylar ómir boıyna bas bostandyǵynan aıyrylýy múmkin.

Jambyl oblysynda esirtki taratýmen aınalysyp kelgen tórt adamnan turatyn qylmystyq top quryqtaldy. Tintý sharalary barysynda ustalǵandardyń turǵylyqty mekenjaılarynan 107 keli marıhýana, 2 keli gashısh, 63 gramm kannabıs shaıyry tárkilendi.

Toptyń barlyq músheleri ýaqytsha ustaý ızolıatoryna qamaldy.

- Esirtki qylmysyna qarsy is-qımyl komıteti el aýmaǵynda esirtki óndirýge qatysty áreketterdiń jolyn qatań túrde kesetin bolady. Bul baǵyttaǵy jumystar júıeli túrde jalǵasady, - delingen habarlamada.

Osyǵan deıin Túrkistan oblysynda esirtkiniń zańsyz aınalymyna qatysty 130-dan astam qylmys anyqtalǵany týraly jazdyq.