Almaty men Shymkentte avtoturaqty kimder tegin paıdalana alady
ALMATY. KAZINFORM — Almatyda 17 myńnan astam kommýnaldyq aqyly avtoturaq orny bar. Al Shymkentte ázirge mundaı turaqtar joq. Kimder avtoturaq aqysyn tóleýden bosatylady, jeńildikti qalaı rásimdeýge bolady jáne elimizdiń úshinshi megapolısinde aqyly turaq júıesi nege jumys istemeıtinin Kazinform tilshisi baıandady.
Shymkentte nege aqyly avtoturaqtar joq?
Shymkent qalalyq jolaýshylar kóligi jáne avtomobıl joldary basqarmasynyń basshysy Rolan Ibragımovtiń redaktsııamyzdyń saýalyna bergen jaýabyna sáıkes, qazir qala aýmaǵynda aqyly avtoturaqtar resmı túrde tirkelmegen.
Basqarma málimetinshe, 2025 jylǵy 17 shildede Qazaqstannyń «Jol qozǵalysy týraly» zańyna ózgerister engizilgen. Atap aıtqanda, respýblıkalyq mańyzy bar qalalar men astananyń jergilikti atqarýshy organdaryna aqyly avtoturaqtardy uıymdastyrý qaǵıdalaryn ázirleý jáne bekitý quqyǵy berilgen.
Alaıda tıisti qaýly jobasyn talqylaý barysynda onyń jekelegen normalary Jer kodeksiniń 109-babynyń 2-tarmaǵyna qaıshy keletini anyqtaldy. Atalǵan normaǵa sáıkes, avtomobıl joldarynyń, kósheler men ótkelderdiń bólingen beldeýindegi jer ýchaskelerin aqyly avtoturaqtar men turaq oryndaryn ornalastyrýǵa jol berilmeıdi.
Budan bólek, basqarma ókilderi «Jol qozǵalysy týraly» zańnyń qoldanystaǵy normalaryna sáıkes, kólik quraldaryn turaqqa qoıǵany úshin aqy alý ókilettigi tek Astana men Almaty qalalarynyń máslıhattaryna berilgenin atap ótti.
— Osyǵan baılanysty qazirgi ýaqytta Shymkent qalasynyń aýmaǵynda aqyly avtoturaqtar tirkelmegen, — dep habarlady basqarma basshysy.
Osylaısha, elimizdegi iri qalalardyń biri sanalatyn Shymkentte kommýnaldyq aqyly avtoturaq júıesi ázirge jumys istemeıdi.
Almatyda kimder avtoturaqty tegin paıdalana alady?
Almatyda jaǵdaı basqasha. Qalalyq Jol ınfraqurylymyn damytý basqarmasynyń málimetinshe, qazir qalada 17 myńnan astam kommýnaldyq aqyly avtoturaq orny bar. Sonymen qatar azamattardyń birqatar sanatyna olardy tegin paıdalaný quqyǵy berilgen.
Basqarma basshysy Oljas Shabdanovtyń redaktsııamyzdyń saýalyna bergen jaýabyna sáıkes, mundaı jeńildik Ekinshi dúnıejúzilik soǵys ardagerlerine, basqa memleketterdiń aýmaǵyndaǵy urys qımyldarynyń ardagerlerine jáne olarǵa teńestirilgen azamattarǵa qarastyrylǵan.
Sondaı-aq kommýnaldyq aqyly avtoturaqtardy eńbek ardagerleri, I jáne II toptaǵy múgedektigi bar adamdar, múgedektigi bar balalardyń zańdy ókilderi, tıisti memlekettik nagradalarmen marapattalǵan kópbalaly analar, Semeı ıadrolyq synaq polıgonyndaǵy synaqtar saldarynan zardap shekken azamattar tegin paıdalana alady. Budan bólek, elektromobıl ıelerine de jeńildik qarastyrylǵan.
Tegin turaq quqyǵyn paıdalaný úshin azamattar tıisti sanatqa jatatynyn rastap, qajetti qujattardy usynýy kerek.
Úıdiń janyndaǵy turaqty qalaı tegin paıdalanýǵa bolady?
Tegin avtoturaq paıdalaný quqyǵy jeńildik sanatyndaǵy azamattarmen ǵana shektelmeıdi. Kóppáterli turǵyn úılerdegi úı-jaılardyń menshik ıeleri men jalǵa alýshylary úıinen 500 metrge deıingi radıýsta ornalasqan bir kommýnaldyq aqyly avtoturaq ornyn tegin paıdalaný quqyǵyn rásimdeı alady.
Bul «bir úı-jaıǵa — bir kólik quraly» qaǵıdaty boıynsha beriledi.
Ótinishti «Almaty parkıng» KMM-niń resmı saıty nemese e-Otinish platformasy arqyly joldaýǵa bolady.
Almatyda turaq aqysyn qalaı tóleýge bolady?
Kommýnaldyq aqyly avtoturaqtardyń operatory — «Almaty parkıng» sharýashylyq júrgizý quqyǵyndaǵy memlekettik kommýnaldyq kásiporny. Kásiporyn avtoturaq oryndaryn uıymdastyrýmen, olardy paıdalanýmen jáne tólemniń jasalýyn baqylaýmen aınalysady.
Júrgizýshiler turaq aqysyn birneshe tásilmen tóleı alady. Atap aıtqanda, tólem termınaldary, «Parkovkı Almaty» mobıldi qosymshasy, operatordyń resmı saıty, ekinshi deńgeıli bankter men uıaly baılanys operatorlarynyń qosymshalary, sondaı-aq SMS arqyly tóleýge bolady.
Keıbir jaǵdaıda turaq belgisindegi QR-kodty skanerlep, kóliktiń derekterin engizý jetkilikti.
Sonymen qatar jekelegen servıster arqyly tólemdi aldyn ala jasaýǵa nemese sol kúngi saǵat 23:59–ǵa deıin keıin tóleýge múmkindik bar. Bul rette tıisti servısterdiń talaptary eskeriledi.
Taǵy 8 myńnan astam turaq orny ashylady
Almatydaǵy aqyly avtoturaqtar jelisi aldaǵy ýaqytta keńeıe túspek. Qalalyq Jol ınfraqurylymyn damytý basqarmasynyń málimetinshe, 2026 jyly qosymsha 8 myńnan astam kommýnaldyq aqyly turaq ornyn uıymdastyrý josparlanǵan.
Osylaısha, olardyń jalpy sany qazirgi 17 myńnan shamamen 25 myńǵa deıin artýy múmkin.
Jańa turaq oryndaryn magıstraldy kóshelerde jáne avtokólikterdiń qozǵalysyn retteý arqyly joldardyń ótkizý qabiletin arttyrýǵa bolatyn ózge de ýchaskelerde ashý kózdelgen.
Josparǵa kóshe boıyndaǵy turaqtarmen qatar, arnaıy alańdardaǵy avtoturaqtar da kiredi. Oryndardy anyqtaý kezinde kólik qozǵalysynyń qarqyndylyǵy, turaqqa degen suranys jáne jol qaýipsizdigin qamtamasyz etý múmkindigi eskeriledi.
Avtoturaqtan túsken qarajat qaıda jumsalady?
Basqarma aqyly avtoturaqtardy paıdalanýdan túsetin qarajattyń qaıda baǵyttalatynyn da túsindirdi.
Vedomstvonyń málimetinshe, túsken qarajat belgilengen tártippen Almaty qalasynyń bıýdjetine aýdarylady. Al ony odan ári bólý bıýdjet zańnamasyna jáne bekitilgen qarjylandyrý baǵyttaryna sáıkes júzege asyrylady.
Osylaısha, búginde Almaty men Shymkent qalalarynda avtoturaq júıesin uıymdastyrý tásilderi aıtarlyqtaı erekshelenedi. Almatyda 17 myńnan astam aqyly turaq orny jumys istep, olardyń sany artyp keledi. Sonymen birge turǵyndardyń jekelegen sanattaryna jeńildikter qarastyrylǵan. Al Shymkentte zańnamadaǵy birqatar shekteýlerge baılanysty aqyly avtoturaq júıesi ázirge engizilmegen.
Eske salaıyq, buǵan deıin Almatyda avtoturaq tarıfiniń ózgerýine baılanysty júrgizýshiler neni bilýi kerek ekenin jazǵanbyz.
Sondaı-aq Almatyda qansha adam avtoturaqty jeńildikpen paıdalanyp júrgeni aıtyldy.
