Almaty men Shymkent arasyndaǵy jol tórt jolaqty boldy
QONAEV. KAZINFORM — Almaty oblysynda Uzynaǵash — Otar avtojolynyń resmı ashylýy ótti.
Almaty men Shymkentti baılanystyratyn avtojoldyń osy bóligi ǵana buryn eki jolaqty bolǵan. Qazir onyń 42 shaqyrymy tolyqtaı jańartylyp, tórt jolaqqa deıin keńeıtildi.
Endi eki megapolıs arasyndaǵy jol júrgizýshiler úshin yńǵaıly bola túspek.
«Uzynaǵash — Otar» avtojolynyń resmı ashylýy saltanatyna Kólik vıtse-mınıstri Maqsat Qalıaqparov qatysty. Ol quttyqtaý sózinde jobanyń mańyzyn atap ótti.
— Búgin aýqymdy joba júzege asyrylyp otyr. «Uzynaǵash — Otar» joly — tranzıttik dáliz, ıaǵnı «Batys Qytaı» — «Batys Eýropa» baǵytynyń bir bóligi. Onyń óńiraralyq mańyzy da bar. Bıyl Qazaqstan boıynsha 13 myń shaqyrym jolda jóndeý jáne qaıta jańartý jumystary júrgizildi. Bul — Memleket basshysynyń kólik-tranzıttik memleketke aınalý týraly tapsyrmasy aıasynda atqarylyp jatqan jumys. Qytaı men Eýropa arasynda Qazaqstan arqyly ótetin júk tasymaly jyl saıyn 30-35 paıyzǵa ósip keledi, — dedi vıtse-mınıstr.
Saltanatty rásimde qozǵalysty bastaý batyrmasy basylyp, jańa jol arqyly 15 kólikten turatyn avtokolonna júrip ótti.
Sonymen qatar is-shara barysynda jobany iske asyrýǵa erekshe úles qosqan jumysshylar marapattaldy.
Kólik mınıstrliginiń málimetinshe, «Uzynaǵash — Otar» kúre jolynda qurylys-montajdaý jumystary 2024 jyly sáýir aıynda bastalǵan.
Basty merdiger — túrkııalyq «KLV INSAAT A.S» kompanııasy. Jobany júzege asyrýǵa 163 birlik tehnıka, 290 maman jumyldyryldy.
Odan bólek eki asfalt-beton zaýyty men tórt jol-qurylys basqarmasy jumys istedi.
Al Almaty oblysynyń jolaýshylar kóligi jáne avtomobıl joldary basqarma basshysy Ermek Baımuhambetovtyń aıtýynsha, buryn atalǵan jol aýmaǵy eki jolaqty bolǵan soń munda jıi jol apaty bolady.
Avtojol keńeıtilgennen keıin aldaǵy ýaqytta bul kórsetkish tómendeýge tıis.
Eske salaıyq, Almaty oblysynda respýblıkalyq mańyzy bar taǵy bir avtojol — Qonaev-Kúrti jolynyń qurylysy júrip jatyr.
Onyń ashylýy 2025 jyldyń jeltoqsan aıyna josparlanǵan.
