Almaty men oblys arasyndaǵy mańyzdy avtojol keńeıtilip jatyr

QONAEV. KAZINFORM — Almaty mańyndaǵy birneshe respýblıkalyq avtojolda jóndeý jumystary júrip jatyr.

QazAvtoJol kompanııasynyń málimetinshe, qazir halyq arasynda «Joǵarǵy trassa» atalyp ketken «Almaty-Shamalǵan-Uzynaǵash» avtojolynyń 20-23 shaqyrymy aralyǵynda ortasha jóndeý jumystary júrip jatyr. Táýligine 40 myńnan astam kólik qatynaıtyn joldyń 3 shaqyrymy keńeıtilip, jol jabyny tóseledi.

Odan bólek QazAvtoJol kompanııasy Qulja tasjolynda ortasha jóndeý jumystary qarqyndy júrip jatqanyn málimdedi. Munda 35 jumysshy jáne 25 arnaıy tehnıka jumyldyrylǵan. Qazirgi ýaqytta joldyń 29 shaqyrymynda jabynnyń tómengi qabaty tolyqtaı salynǵan. Sonymen qatar joǵarǵy qabatynda 17 shaqyrymyndaı qıyrshyq tasty-mastıkalyq asfalt tóselgen.

- Kópshilik arasynda Qulja tasjoly atalyp ketken «Almaty - Kókpek - Kóktal- Qorǵas» respýblıkalyq avtomobıl jolynyń 14-43 shaqyrym aralyǵynda ortasha jóndeý jumystary qarqyndy júrip jatyr. Bul táýligine 60 myń kólik qatynaıtyn kólik qarqyny joǵary joldardyń biri, - dep habarlady QazAvtoJol.

Eske salaıyq, buǵan deıin Qonaev-Kúrti joly Almaty arqyly ótetin kólik aǵynyn qanshalyqty azaıtatynyn jazǵanbyz.