Almaty men Qytaıdyń iri qalalary arasyndaǵy áýe baǵyttary keńeıtilmek
ALMATY. KAZINFORM - Almaty ákimi Erbolat Dosaev pen Air China Limited áýe kompanııasynyń tóraǵasy, China National Aviation Holding Company prezıdenti Ma Chonsıan myrzamen kezdesti.
Kezdesý barysynda Almaty men Qytaıdyń iri qalalary arasyndaǵy áýe qatynasyn keńeıtý, sondaı-aq týrıstik jáne iskerlik baılanystardy nyǵaıtý máselesi sóz boldy.
Іs-shara Almaty ákimi Erbolat Dosaevtyń Qytaı Halyq Respýblıkasyna jasaǵan jumys sapary aıasynda Beıjińde ótti.
Kezdesýdiń negizgi nátıjesi – Almaty ákimdigi men Qytaıdyń ulttyq áýe tasymaldaýshysy Air China arasyndaǵy reısterdi ashýǵa járdemdesý jónindegi memorandýmǵa qol qoıýy boldy.
Taraptar eki el arasyndaǵy ekonomıkalyq ósim men mádenı almasýdyń mańyzdylyǵyn atap, jolaýshylar legin arttyrý ári Qazaqstan men Qytaı týrısterine logıstıkany jeńildetý úshin «Almaty-Beıjiń» qosymsha reısin jáne «Almaty-Chendý» jańa reısin iske qosý múmkindigin qarastyrdy.
- Qol qoıylǵan memorandým – Almatynyń halyqaralyq kólik baılanysyn damytýdaǵy mańyzdy qadam. Qytaı – Almaty týrızmin damytýdaǵy negizgi maqsatty naryqtyń biri. 2024 jyl Qytaıdaǵy Qazaqstan týrızmi jyly bolyp jarııalandy, al bıylǵy jyl – Qazaqstandaǵy Qytaı týrızmi jyly. Byltyr Almatyǵa Qytaıdan 95,3 myńnan astam týrıst keldi, bul 54%-ǵa ósim kórsetti. Jasalǵan kelisim aıasynda týrıstik aǵynnyń qarqyndy damýy jalǵasady dep senemiz, – dedi Erbolat Dosaev.
- Tongcheng Travel Qytaı agenttiginiń «2025 jyldyń bolashaǵy eń zor jańa baǵyty» marapaty Almatynyń týrıstik áleýetiniń moıyndalǵanyn jáne qytaılyq týrısterdiń aımaqqa degen qyzyǵýshylyǵynyń artqanyn kórsetedi. Jalpy, 2024 jyly Almatyǵa shamamen 2 mıllıon týrıst keldi, onyń ishinde 600 myńnan astamy sheteldik. 2025 jyly 2,3 mıllıon týrıst, onyń ishinde 700 myń sheteldik týrıst keledi dep kútilýde, – dedi Erbolat Dosaev.
- Óz kezeginde China National Aviation Holding Company prezıdenti Ma Chonsıan myrza kezdesýge alǵys bildirip, bolashaqtaǵy jemisti yntymaqtastyqqa nıetti ekenin jetkizdi. «Almaty – Qazaqstannyń mádenı, iskerlik jáne týrıstik ortalyǵy, sondaı-aq Eýropa men Azııany baılanystyratyn mańyzdy býyn. Qazaqstannyń basty «áýe qaqpasy» retinde Almaty Ortalyq Azııa boıynsha saıahattardyń bastapqy núktesi bolyp tabylady», – dedi ol.
Almaty-Beıjiń baǵytyndaǵy qosymsha reıs pen «Almaty-Chendý» baǵytyndaǵy jańa reıs 2024 jyldyń maýsym aıynda iske qosylady dep josparlanyp otyr. Qazirgi ýaqytta QR Kólik mınıstrligimen birlesip daıyndyq jumystary júrgizilýde. Tıisti baǵyttar ushý quqyqtary bólingennen keıin ashylady.
«Almaty-Beıjiń» qosymsha reısi men «Almaty-Chendý» jańa reısin bıyl maýsym aıynda iske qosý josparlanýda. Qazirgi ýaqytta daıyndyq jumystary júrgizilip jatyr, tıisti baǵyttar ushý quqyqtary bólingennen keıin ashylady.
Aıta keteıik, Qazaqstannyń eń iri qalasy retinde Almaty kólik ınfraqurylymyn belsendi túrde jańǵyrtyp keledi. 2024 jyly jańa halyqaralyq áýejaı termınalynyń qurylysy aıaqtalyp, onyń ótkizý qabileti jylyna 14 mıllıon jolaýshyǵa deıin artty.
Osyǵan deıin Almatyda qandaı áleýmettik nysandar salynyp, jóndeletini týraly jazǵan edik.