Almaty men bes oblysta uıymdasqan qylmystyq top músheleri ustaldy

ASTANA. KAZINFORM - Almaty qalasynda Uıymdasqan qylmysqa qarsy kúres basqarmasy jáne Ulttyq qaýipsizdik komıteti departamentiniń qyzmetkerleri prokýratýranyń úılestirýimen júrgizilgen jedel izdestirý is-sharalary barysynda qylmystyq topqa qatysy bar jeke kúzet mekemesiniń zańsyz áreketiniń jolyn kesti, - dep habarlaıdy Polisia.kz.

- Tergeý barysynda qylmystyq elementterdiń shaǵyn jáne orta bıznes nysandaryn tolyq baqylaýǵa alý úshin oıyn-saýyq oryndarynyń basshylary men qyzmetkerlerine  qysym kórsetip, zańsyz áreketterge barǵan anyqtaldy. Keıinnen olar kásipkerlik nysandaryn kúshpen basyp alyp, sol jerlerde «qaýipsizdik» qyzmetin júzege asyrǵan.

Almaty qalasy, Jetisý, Túrkistan, Mańǵystaý, Jambyl jáne Almaty oblystarynda qylmystyq toptyń 20 múshesi ustaldy. 40-tan astam tintý júrgizilip, jeti atys qarýy tárkilendi. Onyń ishinde úsh sholaq myltyq, Makarov tapanshasy, Kalashnıkov avtomaty jáne 100-den astam oq-dári alyndy, - dedi ІІM uıymdasqan qylmysqa qarsy kúres departamentiniń ókili Qýandyq Alpys.

Buzaqylyq, bopsalaý, adam urlaý, óz betinshe bılik júrgizý jáne densaýlyqqa zııan keltirý faktileri boıynsha tergeý júrip jatyr. Toptyń jetekshisi men qatysýshylaryna qatysty uıymdasqan qylmystyq top qurý, oǵan basshylyq etý jáne qatysý derekteri boıynsha sotqa deıingi tergeý bastaldy.

Fıgýranttardyń basqa da uqsas qylmystarǵa qatysy bar-joǵy tekserilýde.

- Bızneske qysym kórsetý jáne oǵan qylmystyq aralasý áreketteriniń barlyq faktileri memleket baqylaýynda. Kez kelgen zańsyz áreket zań sheńberinde qatań túrde toqtatylady - delingen habarlamada.

Osyǵan deıin Qaraǵandy oblysynda Uıymdasqan qylmysqa qarsy kúres basqarmasynyń ókilderi eki qylmystyq top múshelerin ustaǵany týraly jazdyq.