Almaty men bes oblysta qar kóshkini júrý qaýpi joǵary - TJM
ASTANA. KAZINFORM - Qar kóshkini jaǵdaıyn baqylaý maqsatynda «Qazseldenqorǵaý» MM mamandary kóshkin qaýpi bar aýmaqtarǵa turaqty monıtorıngjúrgizip, olardy júıeli túrde tekseredi.
Búgingi kúni respýblıka boıynsha 378 jerústi tekserý júrgizildi. Qar kóshkini júrýi múmkin aýdandarda 110 eskertý belgisi ornatyldy.
Qolaısyz aýa raıy jaǵdaıyna jáne keıbir ýchaskelerde qar jamylǵysynyń jınalýyna baılanysty kóshkin qaýpi joǵary jekelegen ýchaskelerde qar kóshkinderiniń ózdiginen túsý qaýpi saqtalyp otyr.
2025–2026 jyldardaǵy qar kóshkini qaýpi bar kezeń bastalǵaly (2025 jylǵy qarasha aıynan bastap) Almaty qalasynda, Almaty, Jambyl jáne Shyǵys Qazaqstan oblystarynda jalpy kólemi 175600 m³ qar kóshkinderiniń 66 ózdiginen túsý faktisi tirkeldi. Halyqtyń qaýipsizdigin qamtamasyz etý maqsatynda jalpy kólemi 113246 m³ qar massasymen 99 profılaktıkalyq qar kóshkinin túsirý jumystary júrgizildi.
-Túrkistan jáne Jambyl oblystarynyń bıik taýly aýdandarynda, sondaı-aq Almaty qalasy, Almaty, Shyǵys Qazaqstan jáne Jetisý oblystarynyń taýly aýdandarynda qar kóshkini qaýpi saqtalýda, qar kóshkinderiniń ózdiginen túsý yqtımaldyǵy joǵary, - delingen habarlamada.
Kóshkinderdiń júrýine túrtki bolý qaýpine baılanysty qar basqan betkeılerge shyqpaǵan jón.
Sol sebepti TJM qar kóshkini qaýpi týraly eskertý jarııalanǵan kezeńde taýly aımaqtarǵa barýdan bas tartýdy usyndy.
Osyǵan deıin jeksenbide Qazaqstannyń basym bóliginde aýa raıyna baılanysty eskertý jarııalanǵany týraly jazdyq.
