Almaty men Astanada júrgizýshisiz taksı jobasy iske qosylady

ASTANA. KAZINFORM – Elimizde júrgizýshisiz kólikterdi synaqtan ótkizý bastalady. Bul týraly QR Jasandy ıntellekt jáne tsıfrlyq damý mınıstrliginiń baspasóz qyzmeti habarlady.

Vedomstvo málimetinshe, qalalyq mobıldik pen logıstıka salasynda birqatar ınnovatsııalyq jobalardy júzege asyrý josparlanyp otyr. Atap aıtqanda, Almaty jáne Astana qalalarynda, sondaı-aq Aqmola oblysynyń aýmaǵynda pılottyq rejımde júrgizýshisiz taksı jobalaryn iske qosý kózdelgen.

Uzaq merzimdi perspektıvada bul baǵyt tsıfrlyq ekonomıkanyń jańa segmentin qalyptastyryp, bıýdjetke qosymsha túsimder ákelýge múmkindik beredi.

Mınıstrlik ókilderiniń aıtýynsha, jobalar zamanaýı tehnologııalardy engizý arqyly kólik salasynyń tıimdiligin arttyrýǵa jáne tsıfrlyq ınfraqurylymdy damytýǵa baǵyttalǵan.

Aıta keteıik, buǵan deıin Almatyda 1 mamyrdan bastap júrgizýshisiz 50 avtokólik taksı qyzmetin atqaratyny habarlandy.