Almaty men Astana álemdegi úzdik stýdenttik qalalar reıtınginde joǵarylady
ASTANA. KAZINFORM — Qazaqstan stýdenttik qalalardyń tartymdylyǵy boıynsha Ortalyq Azııadaǵy kóshbasshylyq ornyn saqtap qaldy. QS Best Student Cities 2027 halyqaralyq reıtınginde Almaty men Astana óz kórsetkishterin jaqsartyp, álemdegi stýdentter úshin eń qolaıly qalalardyń qataryna endi.
QS Quacquarelli Symonds halyqaralyq taldaý agenttigi jarııalaǵan QS Best Student Cities 2027 reıtınginde Almaty 13 satyǵa kóterilip, álem boıynsha 78-orynǵa turaqtady. Bul — Qazaqstan qalalarynyń atalǵan reıtıngtegi eń joǵary nátıjesi ári Ortalyq Azııadaǵy úzdik kórsetkish. Bul týraly Ǵylym jáne joǵary bilim mınıstrliginiń baspasóz qyzmeti habarlady.
Al Astana segiz satyǵa joǵarylap, 119-orynǵa ıe boldy. Osylaısha, Qazaqstannyń eki iri qalasy da óńirdegi stýdentter úshin eń tartymdy bilim berý ortalyqtary qataryndaǵy ornyn nyǵaıtty.
QS Best Student Cities reıtıngi álem qalalaryn alty negizgi kórsetkish boıynsha baǵalaıdy. Olardyń qatarynda ýnıversıtetterdiń akademııalyq bedeli, qalanyń tartymdylyǵy, túlekterdiń eńbek naryǵyndaǵy suranysy, bilim alý men ómir súrýdiń qoljetimdiligi, stýdenttik qaýymdastyqtyń halyqaralyq quramy jáne stýdentterdiń pikirleri bar. Bıylǵy reıtıngke halyq sany men QS World University Rankings 2027 reıtıngine engen joǵary oqý oryndary bar 150 qala engizilgen.
Almatynyń joǵary kórsetkishke jetýine qaladaǵy joǵary bilim berý júıesiniń damýy yqpal etti. Qazir Almatyda QS World University Rankings 2027 reıtıngine engen toǵyz ýnıversıtet ornalasqan. Sonyń nátıjesinde qala «Ýnıversıtetterdiń reıtıngterdegi nátıjeleri» kórsetkishi boıynsha álemde 50-orynǵa kóterildi.
— Qazaqstannyń taǵy bir mańyzdy artyqshylyǵy — joǵary bilimniń qoljetimdiligi. Oqý aqysy men ómir súrý shyǵyndarynyń qoljetimdiligi boıynsha Astana álemde 9-oryndy, al Almaty 24-oryndy ıelendi. Bul kórsetkishter qazaqstandyq qalalardyń sheteldik stýdentter úshin de tartymdy baǵytqa aınalyp kele jatqanyn kórsetedi, — delingen habarlamada.
Sonymen qatar «Stýdenttik kontıngenttiń ártúrliligi» kórsetkishi boıynsha da eki qalanyń nátıjesi jaqsarǵan. Bul qazaqstandyq joǵary oqý oryndaryna álemniń túrli elderinen keletin stýdentter sanynyń artyp kele jatqanyn ańǵartady.
Eske salaıyq, buǵan deıin Qazaqstanda taǵy bir sheteldik ýnıversıtettiń fılıaly ashylýy múmkin ekenin jazǵanbyz.
