Almaty men Alataý qalasynyń arasynda sýtegimen júretin tikushaq-taksı paıda bolýy múmkin
ASTANA. KAZINFORM – Kólik mınıstri Marat Qarabaev Úkimet otyrysynan keıin ótken baspasóz máslıhatynda Qazaqstanda qashan pılotsyz taksı qyzmet kórsete bastaıtynyn aıtty.
- Biz qazir mobıldi jolaýshy tasymaly deıtin jobany kóbirek talqylap jatyrmyz. Byltyr jyl aıaǵynda biz Ońtústik Koreıaǵa barǵan edik. Sol kezde osyndaı máseleni talqyladyq. Áýejaıdan Alataý qalasyna deıin jolaýshylardy tasymaldaýǵa aeromobılder paıdalaný kózdelip otyr. Bul ózi shý shyǵarmaıtyn, sýtegi tutynatyn, 5 adamǵa deıin jolaýshy sııatyn tikushaq deýge bolady. Qazir bul baǵytta Ońtústik Koreıa men AQSh kompanııalary tabysty jumys istep jatyr. Qazaqstandyq kompanııalardyń biri osyndaı jobany iske asyrýǵa qyzyǵýshylyq tanytty, - dedi ol.
Mınıstrdiń aıtýynsha, atalǵan joba áli zerttelip jatyr.
- Bul osy máseleni aıtarlyqtaı tereń zerttedik jáne áli de pılottyq joba retinde iske asyrý máselelerin pysyqtap jatyrmyz. Birinshi satysynda Almatydan Alataý qalasyna deıin synap kóremiz. Bul 2026 jylǵa qaraı pılottyq negizde iske qosylýy múmkin dep boljap otyrmyz, - dedi Marat Qarabaev.
Atalǵan baspasóz máslıhatynda Marat Qarabaev qosylǵan qun salyǵyn kóterý bastamasy men janarmaı baǵasynyń naryqqa berilýi taksı baǵasyna qalaı áser etetini týraly pikir bildirdi.