Almaty men Alataý qalalarynda áýe taksıi iske qosylady

ASTANA. KAZINFORM – Jasandy ıntellekt jáne tsıfrlyq damý mınıstrligi, amerıkalyq Joby Aero, Inc. kompanııasy, Alatau Advance Air Group Ltd. jáne kásipker Vıacheslav Kım ózara túsinistik jónindegi memorandýmǵa qol qoıdy.

Oǵan sáıkes Alataý qalasynda áýe taksı júıesin qurý maqsatynda shamamen 300 mln AQSh dollaryna elektrli eVTOL ushaqtaryn satyp alý kózdelip otyr.

Mınıstrlik málimtinshe, bul tiginen ushyp-qonatyn ınnovatsııalyq ushý apparattary Qazaqstandaǵy alǵashqy qalalyq áýe mobıldiligi (Urban Air Mobility) jobasynyń negizi bolmaq. Joba aıasynda sertıfıkattaý jáne demonstratsııalyq ushýlarǵa arnalǵan synaq alańyn qurý, sondaı-aq Alataý men Almaty qalalarynyń kólik jelisine áýe taksıdi ıntegratsııalaý josparlanyp otyr.

– Qazaqstan ınnovatsııalyq kóliktiń bolashaǵyna qadam basyp jatyr. Elektrli eVTOL ushaqtaryn satyp alý - smart qalalar men zamanaýı tehnologııalardy engizý baǵytyndaǵy mańyzdy kezeń. Bul shara Alataý qalasyn bolashaqtyń joǵary tehnologııaly, biregeı qala retinde damytýǵa serpin beredi, - dedi Qazaqstan Respýblıkasynyń Premer-mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev.

Joby Aero, Inc. (AQSh) – eVTOL avıatsııa salasyndaǵy álemdik kóshbasshy, sertıfıkattalǵan elektrli áýe taksıleriniń ázirleýshisi.
Vıacheslav Kım – Kaspi.kz dırektorlar keńesiniń tóraǵasy, «Alataý qalasy» jobasynyń ınvestory.
Alatau Advance Air Group Ltd. – Qazaqstandaǵy áýe mobıldiligi tehnologııalarynyń operatory jáne ıntegratory.

Bıyl aqpan aıynda Kólik mınıstri Almaty men Alataý qalasynyń arasynda sýtegimen júretin tikushaq-taksı paıda bolýy múmkin ekenin aıtty.

Qazaqstandaǵy alǵashqy áýe taksıi Almaty oblysynda synaqtan ótedi.