Almaty men 11 oblysta aýa raıyna baılanysty eskertý jarııalandy

Senbi, 28 qazanda elimizdiń 11 oblysy men Almatyda aýa raıyna baılanysty daýyldy eskertý jarııalandy, dep habarlaıdy Kazinform. 

Qazgıdromet sınoptıkteriniń boljamy boıynsha, kúndiz Qostanaı oblysynyń basym bóliginde jaýyn-shashyn (jańbyr, qar) jaýady. Túnde batysta, ońtústikte tuman, kóktaıǵaq bolady. Túnde jáne tańerteń oblystyń batysynda qarly boran soǵady. Oblystyń batysynda, ońtústiginde ońtústik-shyǵystan jel soǵady, ekpini – 15-20 m/s. Qostanaıda tańerteń jáne kúndiz kóktaıǵaq bolady.

Kúndiz Aqmola oblysynyń batysy men ońtústiginde kóktaıǵaq bolady. Ońtústik, kúndiz ońtústik-shyǵystan jel soǵady, oblystyń batysynda ekpini 15-20 m/s jetedi.

Túnde jáne tańerteń soltústikte, Abaı oblysynyń ortalyǵynda tuman túsip, kóktaıǵaq bolady.

Túnde Shyǵys Qazaqstan oblysynyń soltústiginde, shyǵysynda jáne ońtústiginde kóktaıǵaq bolady. Túnde jáne tańerteń oblystyń shyǵysynda jáne ońtústiginde tuman túsedi.

Kúndiz Ulytaý oblysynyń keı jerlerinde qatty jaýyn-shashyn (jańbyr, qar) jaýady. Túnde oblystyń batysynda kóktaıǵaq bolady. Ońtústik-shyǵystan, shyǵystan jel soǵady, kúndiz oblystyń soltústiginde ekpini 18 m/s bolady.

Túnde Aqtóbe oblysynda qatty jaýyn-shashyn (jańbyr, qar) jaýady. Soltústikte, oblys ortalyǵynda kóktaıǵaq bolady. Kúndiz oblystyń soltústik jartysynda tuman túsedi. Ońtústik-shyǵystan soǵatyn jel ońtústik-batysqa aýysady, túnde oblys ortalyǵynda ekpini 15-20 m/s bolady. Aqtóbe qalasynda túnde kóktaıǵaq bolyp, kúndiz tuman túsedi.

Mańǵystaý oblysynyń batysynda, ońtústiginde jáne soltústiginde tuman bolady. Aqtaý qalasynda keı jerlerde tuman túsedi.

Atyraý oblysynyń batysy men soltústiginde túnde qatty jańbyr jaýady. Oblystyń batysynda, ońtústiginde jáne soltústiginde tuman túsedi. Ońtústik-batystan jel soǵady, oblystyń soltústigi men batysynda ekpini 15-20 m/s bolady. Atyraý qalasynda tuman túsedi.

Batys Qazaqstan oblysynyń batysynda jáne ońtústiginde qatty jaýyn-shashyn (kóbinese jańbyr) jaýady. Oblystyń soltústigi men shyǵysynda tuman túsedi. Jel shyǵystan, ońtústik-batystan soǵady, ekpini – 15-20 m/s. Oralda túnde jáne tańerteń tuman túsedi.

Jetisý oblysynyń taýly aımaqtarynda tuman túsedi. Alakól óńirinde soltústik-shyǵystan jel soǵady, ekpini 15-20, túnde 25 m/s.

Ońtústikte, Almaty oblysynyń taýly aımaqtarynda tuman túsedi.

Almatynyń keı jerlerinde tuman bolady.