Almaty memlekettik qýyrshaq teatryna «akademııalyq» mártebe berildi

ALMATY. KAZINFORM — QR Premer-mınıstri Oljas Bektenovtiń 2 jeltoqsandaǵy qaýlysyna sáıkes, Almaty memlekettik qýyrshaq teatryna «akademııalyq» mártebe berildi.

Almaty memlekettik qýyrshaq teatry — respýblıkadaǵy tuńǵysh qýyrshaq teatry. Ol 1935 jyly memlekettik qaıratker Temirbek Júrgenovtiń bastamasymen ashylǵan.

Óner ordasy bıyl 90 jyldyǵyn atap ótti. Teatr balalar men eresekterge arnalǵan tanymdyq spektaklder qoıyp keledi.

Ujym keıingi jyldary halyqaralyq arenada da belsendi. Frantsııa, Kanada, Bolgarııa, Túrkııadaǵy festıvalderge qatysyp, júldeli oryn aldy. Al Almatyda jyl saıyn ótetin halyqaralyq Almaty Puppet Festival qalany qýyrshaq óneriniń mańyzdy ortalyqtarynyń birine aınaldyrdy.

Eske salaıyq, buǵan deıin Almaty memlekettik qýyrshaq teatry Frantsııadaǵy zamanaýı teatr óneriniń eń aýqymdy sharalarynyń biri — Off Avignon halyqaralyq festıvaline qatysýǵa joldama alǵanyn jazǵanbyz.