Almaty mektepterinde robottandyrylǵan monıtorıng kesheni synaqtan ótkizilip jatyr
ALMATY. KAZINFORM – Almatyda polıtsııa bilim berý mekemelerindegi qaýipsizdik deńgeıin arttyrý úshin zamanaýı robottandyrylǵan keshenderdi aprobatsııalaýǵa kiristi.
Pılottyq jobany Almaty polıtsııa departamenti balalardy qorǵaý, quqyq buzýshylyqtardyń aldyn alý jáne qoǵamdyq qaýipsizdik salasyna tsıfrlyq tehnologııalardy engizý mindetteri aıasynda júzege asyryp jatyr.
Robottandyrylǵan qurylǵylar mobıldi patrýldeý jáne monıtorıng fýnktsııalaryn oryndaıdy. Olar belgilengen marshrýttar boıynsha avtonomdy túrde qozǵalyp, beınebaqylaý júrgizip, aqparatty naqty ýaqyt rejıminde ortalyqtandyrylǵan baqylaý júıelerine joldaı alady.
– Qoldanylyp jatqan tehnologııalar avtomatty rejımde áleýetti qaýipti jaǵdaılardy anyqtaýǵa múmkindik beredi. Atap aıtqanda, adamdardyń shoǵyrlanýy, agressıvti minez-qulyq belgileri, sondaı-aq tútindený, órt shyǵý qaýpi jáne ózge de oqıǵalar tirkeledi. Sonymen qatar júıe tulǵalardy jáne kólik quraldarynyń memlekettik tirkeý nómirlerin tanýǵa, sondaı-aq minez-qulyq stsenarıılerin taldaýǵa qabiletti, - delingen habarlamada.
Polıtsııanyń málimetinshe, jedel áreket etý múmkindikterine erekshe nazar aýdarylǵan: shtattan tys jaǵdaı anyqtalǵan sátte aqparat avtomatty túrde tıisti qyzmetterge jiberilip, jedel sharalar qabyldanady.
Qazirgi kezeńde robottandyrylǵan keshender qalanyń bir mektebinde synaqtan ótkizilip jatyr. Pılottyq jobanyń qorytyndysy boıynsha tehnologııanyń tıimdiligine baǵa berilip, ony ári qaraı aýqymdy engizý máselesi qarastyrylady.
Eske salaıyq, buǵan deıin 1 sáýir - 15 mamyr aralyǵynda elimizdiń bilim berý uıymdarynda bilim sapasyn baǵalaýǵa arnalǵan PIRLS-2026 jáne TIMSS-2027 halyqaralyq zertteýi ótkiziletinin habarlaǵanbyz.
