Almaty mektepterinde byltyr býllıngke qatysty 600-den astam habarlama tirkelgen
ALMATY. KAZINFORM – Almatyda balalar arasyndaǵy býllıng máselesi qalaı sheshilip jatyr? Bul suraqqa balalardyń quqyqtaryn qorǵaý basqarmasynyń basshysy Janat Aıtpaeva jaýap berdi.
Onyń aıtýynsha, býllıng máselesi áli de balalardyń qaýipsizdigine tónetin eń úlken qaýip. Sondyqtan qazir onyń aldyn alý jumysyna kóbirek kóńil bólinip otyr.
2025 jyly Almaty mektepterinde býllıngtiń yqtımal jaǵdaılary týraly 638 habarlama tirkelgen.
- Ár ótinish muqııat tekserilip, balalar men janjalǵa qatysýshylarǵa psıhologııalyq ári pedagogıkalyq kómek kórsetildi. Býllıngtiń rastalǵan 6 faktisi boıynsha kámeletke tolmaǵandardyń zańdy ókilderi ákimshilik jaýapkershilikke tartyldy, - dedi Janat Aıtpaeva.
Sonymen qatar «DOSBOLLIKE» baǵdarlamasy aıasynda býllıng pen kıberbýllıngtiń aldyn alýǵa arnalǵan 112 myńnan astam sabaq ótkizilgen. Oǵan 314 myńnan astam oqýshy qatysty.
- Eger siz balanyń quqyqtarynyń buzylǵanyna kýá bolsańyz nemese oǵan kómek qajet ekenin baıqasańyz, 111 biryńǵaı nómirine dereý habarlasa alasyz. Úılestirý ortalyǵy ótinishti «bir tereze» qaǵıdaty boıynsha qabyldap, psıhologtardy, áleýmettik qyzmetkerler mene basqa da qajetti qyzmetterdi jedel túrde iske qosady», – dep túıindedi Janat Aıtpaeva.
Eske salaıyq, Almatyda balamen jumys isteıtin mekemeler eskertýsiz tekseriletin bolady.
