Almaty mektepterinde bıyl JI qalaı qoldanylǵaly jatyr
ALMATY. KAZINFORM – Almatyda 2026–2029 jyldarǵa arnalǵan mektepterge jasandy ıntellektini engizý baǵdarlamasy iske qosylady.
Qalalyq bilim basqarmasynyń basshysy Sáken Aralbaevtyń aıtýynsha, shilde aıynan bastap qaladaǵy 10 mektepte JI servısi synaqtan ótip jatyr. Onyń qatarynda muǵalimniń tsıfrlyq kómekshisi, oqýshyǵa arnalǵan JI-tıýtor men analıtıkalyq júıeler bar.
- Aldaǵy ýaqytta mundaı tehnologııany keńinen qoldaný josparlanyp otyr. Negizgi maqsat – jasandy ıntellekt arqyly pedagogterdiń kúndelikti qaıtalanatyn jumysynyń bir bóligin azaıtý. 2029 jylǵa qaraı muǵalimderdiń ákimshilik júktemesin shamamen 30 paıyzǵa qysqartý kózdelgen, - dedi ol.
Taǵy bir jańa júıe – SANA. Ol pedagogterdiń oqý júktemesin, jalaqy esepteýdi, jumys ýaqytynyń tabelderi men qyzmetkerler týraly naqty derekterdi avtomatty túrde salystyrýy tıis.
Sonymen qatar Sáken Aralbaev oqýshylardyń oqý kestesinde ózgeris bolatynyn atap ótti.
Aıtýynsha, 5–7 synyp oqýshylary úshin «Konstıtýtsııa negizderi» páni, 8–11 synyp oqýshylary úshin «Zań men tártip» kýrsy engiziledi. Oǵan qosa «Jeke qaýipsizdik» kýrsy jalǵasyp, «Jasyl mektep» ekologııalyq jobasy engizile bastaıdy.
Eske salaıyq, buǵan deıin «Informatıka jáne jasandy ıntellekt» páni aıasynda oqýshylar JI-diń qyr-syryn meńgere alatynyn jazǵanbyz.
