Alǵashqy ustaz, alǵashqy sabaq, alǵashqy qońyraý: Almatyda jańa oqý jyly bastaldy
ALMATY. KAZINFORM — Búgin búkil el boıynsha alǵashqy qońyraý soǵylyp, Bilim kúnine arnalǵan saltanatty jıyndar ótti.
Agenttik fototilshisi 100 jyldyq tarıhy bar Shoqan Ýálıhanov atyndaǵy № 12 gımnazııasyna baryp qaıtty.
Bul bilim ordasy áýelide jetim balalar oqyǵan kommýnalyq mektep retinde ashylǵan. Keıin bastaýysh, jetijyldyq, odan soń toǵyzjyldyq mektepke aınaldy. 1930 jyldary № 12 ınternat-mektep bolyp quryldy. Soǵys jyldarynda qyzdar jáne uldar mektebi bolyp bólinip, keıin qaıta biriktirildi.
Keńes dáýirinde qazaq tilinde bilim beretin jalǵyz mektep bolǵan. Sondaı-aq oqý ordasynyń turaqty ǵımaraty bolmaı, toǵyz ret kóshirilgen. Tek 1975 jyly Bógenbaı batyr kóshesi men Qonaev kóshesiniń qıylysyndaǵy qazirgi mekenjaıyna kóshti. Osy kezden bastap aǵylshyn tilin tereńdetip oqytý dástúrge aınaldy.
1994 jyly mektepke Shoqan Ýálıhanovtyń esimi berilip, 2014 jyly «Daryn» júıesindegi daryndy balalarǵa arnalǵan mamandandyrylǵan gımnazııa mártebesin aldy.
Osy mektepten qazaq zııalylary tárbıelenip shyqty: ondaǵan akademık pen ǵylym doktory bilim alǵan.
Tanymal túlekter qatarynda opera ánshisi Kúlásh Baıseıitova, tuńǵysh kásibı sýretshi Ábilhan Qasteev, rejısser Asqar Toqpanov, músinshi Hákimjan Naýryzbaev, halyq ártisteri men kompozıtorlar Nurǵısa Tilendıev, Sydyq Muhamedjanov, Áset Beıseýov, aqyn-jazýshylar Ýálıhan Qalıjan, Smaǵul Elýbaı, Shárbaný Qumarova, rejısserler Satybaldy Narymbetov, Rústem Ábdirashev, Nurqanat Jaqypbaı jáne basqa da tanymal tulǵalar bar.
№ 12 gımnazııada bul kúni erekshe atmosfera ornady. 1 qyrkúıek erekshe kóńil kúıde bastaldy: gúl ustaǵan, aq bantık taqqan balalar, júregi lúpildep turǵan ata-analardyń qýanyshty kúlkisi…
Uıalyp turǵanymen, júzderi jarqyraǵan birinshi synyp oqýshylary qoldaryna gúl ustap, kópten kútken alǵashqy qońyraýdy estidi. Olar óleń oqyp, án shyrqady.
Al bitirýshi synyp oqýshylary bul kúndi sál-pál tolqýmen ári úlken jaýapkershilikpen qarsy aldy — alda UBT men eresek ómirge bastar jańa kezeń kútip tur.
Ondaǵan jyldar boıy osy gımnazııada eńbek etip kele jatqan ustazdar quttyqtaýlar men alǵys sózderdi estidi. Olardyń eńbeginiń arqasynda búgingi tańda gımnazııa túlekteriniń 90%-y bilim grantynyń ıegeri atanyp, al oqýshylar pán olımpıadalary men ǵylymı jobalarda únemi jeńimpaz atanyp júr.
Bıyl Almatyda birinshi synypqa 29 240 bala qabyldandy. Olar úshin bul — alǵashqy sabaq, alǵashqy ustaz jáne alǵashqy mektep formasy.
Sondaı-aq bıyl 19 765 oqýshy 11-synypqa ótti. Qalǵan synyptar úshin 2 qyrkúıekte Bilim kúnine arnalǵan «synyp saǵaty» ótedi.
Almatyda jańa oqý jylynda «Keleshek mektepteri» jobasy aıasynda 12 myń orynǵa arnalǵan 7 jańa mektep esigin ashty. Olar Terekti, Samǵaý, Qarasý, Aqbulaq, Nurly Dala shaǵyn aýdandarynda, sondaı-aq Levıtan kóshesi men Raıymbek dańǵylynda ornalasqan. Jańa mektepterge 10 889 oqýshy qabyldanyp, 693 muǵalim jumysqa ornalasty.
Qyrkúıek aıynyń sońyna deıin taǵy 10,5 myń orynǵa arnalǵan bes mektep ashylady.
Sonymen qatar «Mektep avtobýsy» jobasy júzege asyrylyp jatyr. Qazirdiń ózinde ol 44 memlekettik mekteptiń 7 532 oqýshysyn tasymaldaıdy.
Eske salaıyq, 1 qyrkúıekten bastap elimizdiń barlyq bilim berý uıymynda «Jeke qaýipsizdik» sabaqtary qaıta oqytylady.