Almaty mektepteri 6 kúndik oqý aptasyna kóshýi múmkin be
ALMATY. KAZINFORM – Almatyda 6 kúndik oqý aptasyna kóshý máselesi talqylandy.
Oqý-aǵartý mınıstrligi buǵan deıin ár mektep mundaı sheshimdi óz betinshe qabyldaı alatynyn habarlaǵan bolatyn. Alaıda Almaty qalasy ázirge 6 kúndik oqý formatyna kóshýdi josparlap otyrǵan joq. Bul týraly qalalyq Bilim basqarmasynyń basshysy Sáken Aralbaev aıtty. Onyń sózinshe, megapolıs mektepteri jańa oqý jylynda 5 kúndik oqý júıesi boıynsha jumys isteıdi.
Sondaı-aq vedomstvo basshysy qazir Almatyda úsh aýysymdy mektepter joq ekenin aıtyp, aldaǵy ýaqytta qala bir aýysymda jumys isteıtin mektepterdiń sanyn birtindep arttyrýdy kózdeıtinin jetkizdi.
Odan bólek Sáken Aralbaev Almatydaǵy memlekettik mektepter jumys isteıtin BilimClass platformasyna toqtalyp, oqýshylardyń derbes derekteri qorǵalǵanyn rastady.
- Bilim basqarmasynda oqýshylardyń derbes dereginiń taralýyna qatysty rastalǵan jaǵdaı tirkelmegen. BilimClass memlekettik standarttar men aqparattyq qaýipsizdik talaptaryna sáıkes keledi. Sonymen qatar derekterdi qorǵaý máseleleri beıindi memlekettik organdarmen qosymsha pysyqtalǵan, - dedi ol.
Eske salaıyq, buǵan deıin Almaty mektepterinde JI qalaı qoldanylatynyn jazǵanbyz.
