Almaty máslıhaty 2025 jylǵa naqtylanǵan bıýdjet jobasyn qoldady

ALMATY. KAZINFORM — Almatyda 2025 jylǵa arnalǵan jergilikti bıýdjetti naqtylaý jónindegi máslıhat otyrysy ótti.

Qarjy basqarmasynyń basshysy Qanat Sýhambekovtyń sózinshe,bıýdjet jobasy máslıhat depýtattarynyń atsalysýymen ázirlenip, komıssııalarda jan-jaqty qaraldy.

Naqtylanǵan soma 97 mlrd teńge. Bul qarjy memlekettik satyp alýlardaǵy únem, qarajatty qaıta bólý, ótken jyldan qalǵan qaldyqtardy paıdalaný jáne kiris bóliginiń ósýi esebinen qalyptasty. 

Bıýdjet negizinen áleýmettik salany, ınfraqurylymdy damytýǵa, turǵyn úı-kommýnaldyq sharýashylyqty jańǵyrtýǵa jáne qalalyq ortaǵa tsıfrlandyrýdy engizýge baǵyttalǵan.

Densaýlyq saqtaý salasyna qosymsha 17 mlrd teńge bólinedi. Almaly, Naýryzbaı jáne Túrksib aýdandarynda ár aýysymda 500 adamdy qabyldaı alatyn 4 jańa emhananyń qurylysy bastalady. №4 qalalyq klınıkalyq aýrýhananyń qurylysy jalǵasady. Sondaı-aq, orfandyq aýrýmen aýyratyn almatylyqtar úshin medıtsınalyq qural-jabdyqtar men dári-dármek satyp alýǵa, №23 emhanany jáne «Alaý» ońaltý ortalyǵyn kúrdeli jóndeýden ótkizýge qarjy qarastyrylǵan.

Bilim berý salasynda Jas Qanat shaǵynaýdanyndaǵy jańa balabaqshanyń qurylysyn aıaqtaýǵa, Alataý jáne Almaly aýdandaryndaǵy №168 jáne №10 balabaqshalardy qaıta jańǵyrtýǵa qarajat bólinedi. Sonymen qatar, №174 mektepke qosymsha qurylys, №17, №50, №56 jáne №124 mektepterge seısmıkalyq nyǵaıtý jumystary júrgiziledi.

Mádenıet salasyna qosymsha 9,4 mlrd teńge bólinip otyr. Bul qarjy Sats atyndaǵy teatrdy qaıta jóndeýge, 3 kitaphana men 3 kommıýnıtı-ortalyq ashýǵa jumsalady. 

Turǵyn úı-kommýnaldyq sharýashylyqty damytýǵa 17,5 mlrd teńge qarastyrylyp otyr. Dostyq shaǵynaýdany men Áýezov aýdanynda sý qubyry jelileriniń qurylysy aıaqtalady, Tastybulaq pen Taýsamalda jańa qurylys bastalady. 

Túrksib aýdanyndaǵy káriz tazalaý qondyrǵylary men sorǵy stantsııalary jańǵyrtylady. Elektrmen jabdyqtaý men kóshe jaryǵy jobalary iske asady. Qaırat shaǵynaýdanynda gaz tartý jumystary qolǵa alynbaq.

Turǵyn úı qoryn jańǵyrtý aıasynda kópqabatty úılerdiń kúrdeli jóndeýi, órt qaýipsizdigi júıelerin ornatý qarastyrylǵan. «Taza Qazaqstan» ulttyq jobasy aıasynda jeke sektorda 100 jańa qoqys konteıner alańy ornatylady. Altynkól toǵanyn tazalaý, qalanyń segiz aýdanynda 248 úıdiń qasbetin jóndeý josparda.

Kólik ınfraqurylymyn damytýǵa 13,6 mlrd teńge baǵyttalady. Saın kóshesi boıyndaǵy janama jol ýchaskeleriniń qurylysy, Erjanov kóshesindegi temirjol arqyly ótetin jaıaý júrginshi kópirdiń qurylysy aıaqtalady. 

Ermensaı, Nurlytaý jáne Nur-Alataı shaǵynaýdandarynda jańa joldardyń jobasy ázirlenedi. Gate City jáne Yntymaq shaǵynaýdandarynda jaıaý júrginshi ótkelderiniń jobasy ázirlenedi.

Jol qaýipsizdigin arttyrý maqsatynda 900 elektrondy tablo ornatý kózdelip otyr. Sonymen qatar, Almaty ákimdigi janyndaǵy jobalyq keńseniń qoldaýymen zııatkerlik kólik júıesi – ITS engiziledi. Bul júıe beınebaqylaý, baǵdarsham, avtoturaq pen qoǵamdyq kólikti biriktirip, kólik qozǵalysyn tıimdi basqarýǵa múmkindik beredi.

Qanat Sýhambekov baıandama sońynda naqtylanǵan bıýdjettiń basty maqsaty – shahardyń mańyzdy máselelerin sheshý, almatylyqtardyń ómir sapasyn jaqsartý jáne qaýipsiz, jaıly qalalyq orta qalyptastyrý ekenin atap ótti.

Buǵan deıin Almatyda byltyr bıýdjetten 47 mlrd teńge ıgerilmegeni týraly jazǵan edik.