Almaty – Máskeý baǵytyndaǵy poıyz jolǵa shyqty
ALMATY. KAZINFORM — 26 qazanda «Almaty – Máskeý» baǵytyndaǵy poıyz jolǵa shyǵyp, Qazaqstan men Reseı arasyndaǵy tikeleı temirjol qatynasy resmı túrde jandandy. Alǵashqy reıspen shamamen 40 jolaýshy saparǵa attandy. Bul týraly «Jolaýshylar tasymaly» AQ baspasóz qyzmeti málim etti.
Jańa baǵyttaǵy poıyz quramyna bıyl otandyq «ZIKSTO» AQ zaýytynda shyǵarylǵan zamanaýı jolaýshylar vagondary engizildi.
— Kýpe jáne platskart vagondary jetildirilgen dybys oqshaýlaý júıelerimen, zamanaýı jeldetkish jáne sanıtarlyq toraptarmen jabdyqtalǵan. Sondaı-aq, múmkindigi shekteýli azamattarǵa arnalǵan arnaıy vagondar qarastyrylǵan. Quramda 36 oryndyq bir kýpe vagony jáne 52 oryndyq bir platskart vagony bar, — delingen habarlamada.
«Almaty — Máskeý» baǵytyndaǵy vagondar Saratov stantsııasyna deıin № 7/8 «Almaty — Saratov» poıyzynyń quramynda júredi. Saratovta vagondar № 85/86 «Derbent — Máskeý» poıyzyna tirkelip, Reseı astanasyna deıin jetedi. Almaty-2 stantsııasynan jóneltý ýaqyty — 20:20.
Máskeýden keri baǵyttaǵy alǵashqy poıyz 30 qazanda jolǵa shyǵady. Qozǵalys kestesine sáıkes, 2025 jylǵy 26–30 qazan aralyǵynda poıyzdar Almaty-2 stantsııasynan jup kúnderi jóneltiledi. 1 qarashadan 13 jeltoqsanǵa deıin qozǵalys taq kúnderi uıymdastyrylady.
Jolaýshylar bıletterin resmı bilet.railways.kz saıtynan nemese temirjol vokzaldarynyń kassalarynan satyp alýǵa bolady.
Eske sala keteıik, buǵan deıin Almaty men Máskeý arasyndaǵy tikeleı temirjol qatynasy qalpyna keltirilgenin jazǵan edik.