Almaty mańyndaǵy jol apatynan zardap shekken úndistandyq stýdentterdiń jaǵdaıy qalaı

QONAEV. KAZINFORM — Almaty mańyndaǵy jol apatynan zardap shekken úndistandyq stýdentterdiń jaǵdaıy belgili boldy. 

Almaty oblystyq densaýlyq saqtaý basqarmasynyń málimetinshe, 2026 jylǵy 6 qańtarda saǵat 11:00–12:00 aralyǵynda Almaty — Bishkek tasjolyndaǵy Tarǵap aýylyna jaqyn jerdegi jol apatynda zardap shekken Úndistannyń úsh azamaty Jambyl aýdanynyń Ortalyq aýdandyq aýrýhanasyna jetkizildi.

— Barlyǵy shuǵyl túrde dárigerlerdiń qaraýynan ótip, alǵashqy tekserýden soń jedel járdem jáne jansaqtaý bólimderine jatqyzyldy. Keıin bir naýqas hırýrgııa bóliminde, ekinshi naýqas jansaqtaý bóliminde emdi jalǵastyrdy. Úshinshi naýqastyń jaǵdaıy asa aýyr edi. Jansaqtaý jáne jedel terapııa sharalaryna qaramastan, ol 9 qańtarda qaıtys boldy, — dep habarlady vedomstvo.

Qazirgi ýaqytta medıtsınalyq qyzmetkerler zardap shekkenderge qajetti em-dári jáne dıagnostıkalyq sharalardy júrgizip jatyr.

— Barlyq tekserý ótkizildi, profıldi mamandarmen konsýltatsııalar uıymdastyryldy. Emdeý bekitilgen klınıkalyq hattamalarǵa sáıkes júrgizilip jatyr, — delingen habarlamada.

Eske salaıyq, buǵan deıin Almaty mańynda jantúrshigerlik jol apaty bolǵanyn jazǵanbyz.

Úndistannyń Astanadaǵy elshiliginiń habarlaýynsha, kólik ishinde Shymkenttegi Ońtústik Qazaqstan medıtsına ýnıversıtetiniń tórt stýdenti jáne Úndistannan kelgen bir týrıst bolǵan.

Olar Shymkentten Almatyǵa qaraı jol júrip bara jatqan jatqan. Eki adam oqıǵa ornynda qaza tapty, al úsheýi aýyr jaraqat alyp, jansaqtaý bóliminde em qabyldap jatqany habarlandy.

Almaty oblystyq polıtsııa departamentiniń málimetinshe, qaıǵyly oqıǵa «Almaty — Bishkek» avtojolynyń 86-shaqyrymynda bolǵan. Jol apatyna qatysty qylmystyq is tirkeldi. Aldyn ala málimetter boıynsha, Toyota Alphard markaly avtokóliktiń 33 jastaǵy júrgizýshisi rólge ıe bola almaı, kólikti aýdaryp alǵan.

Al búgin, 9 qańtarda osy jol apatynda zardap shekken taǵy bir úndistandyq stýdenttiń qaıtys bolǵany habarlandy.