Almaty mańyndaǵy taýda tas qulap jaraqat alǵan jasóspirim qutqaryldy
ALMATY. KAZINFORM – Almaty qalasy TJD qutqarýshylary Tıtov shyńynda jaraqat alǵan jasóspirimdi qutqarý operatsııasyn júrgizdi.
Keshe «Tuıyq sý» baqylaý-qutqarý pýnktinen qutqarýshylar Medeý aýdanyndaǵy Tıtov shyńyna attanǵan. Onda úsh bala men bir eresek taýǵa kóterilgen. Taýdan túsý kezinde 2009 jyly týǵan jasóspirimge tas qulap, bileginiń ashyq synýy tirkelgen.
- Qutqarýshylar zardap shegýshige alǵashqy medıtsınalyq kómek kórsetip, izdestirý-qutqarý beketine jetkizdi. Ol TJM Apattar medıtsınasy ortalyǵynyń dárigerlerine tapsyryldy. Jaǵdaıy turaqty, esi oryndy, ózdiginen júre alady, - delingen aqparatta.
TJM tasty jerlerde saq bolý, bórtpelerden aýlaq júrý jáne tastardyń qulaý qaýpi bar jerlerde basqa adamdardyń astynda kóterilmeý qajettigin eskertedi.
Aıta keteıik, Tıtov shyńy teńiz deńgeıinen shamamen 3800 metr bıiktikte ornalasqan jáne Almaty mańyndaǵy tanymal týrıstik baǵyttardyń biri sanalady.
Buǵan deıin Alakólde 14 adam, onyń ishinde 8 bala qutqaryldy.