Almaty mańyndaǵy taýda bes týrıst qutqaryldy
ASTANA. KAZINFORM – Almatydaǵy Býtakov shatqalyndaǵy sarqyrama mańynda, teńiz deńgeıinen 2 myń metrden astam bıiktikte Býkreev shyńynan túsip kele jatqan 2007 jyly týǵan bes jas týrıst baǵytynan jańylyp, ózdiginen jol taba almaı qalǵan, dep habarlaıdy QR Tótenshe jaǵdaılar mınıstrligi.
Kómek qajet ekenin túsingen olar 112 nómirine habarlasqan.
– Oqıǵa ornyna Almaty qalasy TJD Qutqarý qyzmetiniń mamandary jedel jetti. Qutqarýshylar týrısterdi taýyp, olardy «Butaqty» baqylaý-qutqarý beketine deıin aman-esen túsirdi. Medıtsınalyq kómek eshqaısysyna qajet bolǵan joq, – delingen TJM habarlamasynda.
Tótenshe jaǵdaılar mınıstrligi taýǵa shyǵar aldynda baǵytty aldyn ala josparlaýǵa, óz múmkindikterińizdi durys baǵalaýǵa jáne baratyn baǵytyńyz týraly jaqyndaryńyzǵa aldyn ala habarlaýǵa shaqyrady.
Eske sala ketsek, buǵan deıin Almaty taýlarynda adasyp qalǵan tórt týrıst qutqarylǵanyn jazdyq.
