Almaty mańyndaǵy taýda adasyp ketken eki jasóspirim qutqaryldy
ASTANA. KAZINFORM — Almaty mańyndaǵy taýda adasyp ketken eki jasóspirimdi Tótenshe jaǵdaılar mınıstrliginiń qutqarýshylary taýyp, aman-esen alyp shyqty.
TJM málimetinshe, jasóspirimder taýǵa óz betinshe shyǵyp, belgilengen ýaqytta oralmaǵannan keıin olardyń joǵalǵany týraly habar túsken.
Habarlama túsken boıda Almaty tótenshe jaǵdaılar departamenti Qutqarý qyzmetiniń mamandary izdestirý-qutqarý jumystaryna kiristi. Qutqarýshylar taýly aımaqtyń erekshelikterin eskere otyryp, jasóspirimder júrýi múmkin baǵyttardy tekserdi.
Іzdestirý nátıjesinde olar Qarasaı aýdanyndaǵy Týrıst shyńy mańynan tabyldy. TJM málimetinshe, jasóspirimderdiń jaǵdaıy jaqsy, medıtsınalyq kómek qajet bolmaǵan.
Qutqarýshylar turǵyndardy taýǵa shyǵar aldynda qaýipsizdik erejelerin: marshrýtty aldyn ala josparlaýǵa, jaqyndaryńyzǵa qaıda baratynyńyzdy jáne qashan oralatynyńyzdy habarlaýǵa, tolyq qýattalǵan uıaly telefon alyp júrýge jáne aýa raıy boljamyn eskerýge úndedi.
Eske salaıyq, buǵan deıin Tótenshe jaǵdaılar mınıstrligi qyzmetkerleri Alakólde alty adamdy qutqardy.
