Almaty mańyndaǵy ózen-kólderde sý deńgeıi kóterilip, sel júrýi múmkin

ALMATY. KAZINFORM — Almatyda aýa raıyna baılanysty eskertý jarııalandy.

«Qazgıdromet» RMK jarııalaǵan eskertýge sáıkes, Almaty qalasynda 22-24 maýsym aralyǵynda qatty jaýyn-shashynǵa baılanysty ózen-kólderde sý deńgeıi kóterilip, qaýipti belgilerden asqan jaǵdaıda taý bókteri men soǵan jaqyn aýdandarda sý tasqyny bolýy múmkin.

Sınoptıkterdiń boljaýynsha, 22 maýsymda jaýyn jaýyp, naızaǵaı oınaıdy. Soltústik Batystan soǵatyn jeldiń ekpini sekýndyna 15-20 metrge deıin jetedi. Osyǵan baılanysty TJD turǵyndardy jaqyn ornalasqan aryqtar men kanaldardy qoqystan tazartýǵa shaqyrdy.

Aldaǵy táýlikterde Qazaqstannyń basym bóligi tsıklonnyń yqpalynda bolady. Naızaǵaı jarqyldap, jańbyr jaýyp, daýyldy jel soǵady. Elimizdiń batysynda, soltústiginde, soltústik-batysynda burshaq jaýýy múmkin.

22-23 maýsymda elimizdiń batysynda, 22-24 maýsymda soltústik-batysynda, 22 maýsymda elimizdiń soltústiginde qatty jańbyr jaýady.