Almaty mańyndaǵy Qulja traktisiniń ýchaskesinde ýaqytsha shekteý engiziledi

ALMATY. KAZINFORM – «QazAvtoJol» UK» AQ baspasóz qyzmeti 2024 jyldyń 15 qyrkúıeginde saǵat 20:00-den bastap 16 qyrkúıek saǵat 07:00-ge deıin «Almaty – Kóktal – Shonjy – Qorǵas» respýblıkalyq mańyzy bar avtojolynyń ortasha jóndeý jumystaryna baılanysty Qulja traktisiniń 14-16,5 shaqyrym aralyǵyndaǵy ýchaskesinde shekteý qoıylatynyn habarlady. 

Bul ýchaskede qozǵalys 11 saǵat ishinde reversıvti túrde uıymdastyrylady. Jumystar joldyń shyǵys jaǵynda júrgizilip, jol bir jolaqty qozǵalyspen qamtamasyz etiledi.

– Atalmysh jerde arnaıy eskertý belgileri men merdiger mekemeniń baılanys nómirleri kórsetilgen aqparattyq stend ornatylady. Saparlaryńyzdy aldyn ala josparlaýyńyzdy suraımyz. Aldaǵy ýaqytta jóndeý jumystaryna baılanysty Qulja traktisiniń boıyndaǵy eldi mekenderde qozǵalysqa ýaqytsha shekteýler qoıylýy múmkin, - dep habarlady «QazAvtoJol».

Eske salaıyq, buǵan deıin Almatynyń keıbir kósheleri qazan aıynyń basyna deıin jabylatynyn jazǵanbyz.