Almaty mańynda jol apatynan 21 jastaǵy mopedshi qaıtys boldy

ALMATY. KAZINFORM – Áleýmettik jelide qaıǵyly oqıǵanyń beınejazbasy tarady. Onda mopedpen jol apatyna ushyraǵan jas jigittiń mert bolǵany aıtylady.

Almaty oblysynyń Polıtsııa departamenti aıtylǵan oqıǵa Almaty mańyndaǵy Tuzdybastaý aýylynda bolǵanyn habarlaıdy.

«Mopedtiń qatysýymen jol apaty 10 shilde kúni Tuzdybastaý aýylynda bolǵan. Júrgizýshi rýldi basqara almaı, mopedtiń aýdarylýyna jol bergen. Apat saldarynan júrgizýshi sol jerde qaıtys boldy. Jolaýshy túrli jaraqattarmen aýrýhanaǵa jatqyzyldy. Óńir polıtsııasy jol qaýipsizdigi talaptaryn buzbaýǵa jáne QR Jol qozǵalys erejelerin qatań saqtaýǵa shaqyrady. Kólik júrgizý kezinde basqa jol qozǵalysyna qatysýshylardyń ómiri men qaýipsizdigi sizge baılanysty ekenin umytpańyz», - dep habarlaıdy oblystyq PD baspasóz qyzmeti.

Eske salaıyq, buǵan deıin Almatydaǵy aıypturaqta myńnan asa moped turǵanyn jazǵan edik.