Almaty mańynda apatqa ushyraǵan Bek Air ushaǵyna qatysty tergeý aıaqtaldy

ALMATY. KAZINFORM — Kóliktegi polıtsııa departamenti 2019 jyly Almaty mańynda apatqa ushyraǵan Bek Air Fokker-100 ushaǵy boıynsha qylmystyq isti tergeýdi aıaqtady.

– Qazir Qylmystyq is júrgizý kodeksiniń talaptaryna sáıkes kúdiktilerdiń qorǵaýshylary qylmystyq is materıaldarymen tanysý ústinde. Іs materıaldarymen tanysý aıaqtalǵan soń protsessýaldyq sheshim qabyldanady, – dep habarlady Kóliktegi polıtsııa departamentiniń baspasóz qyzmeti.

Jaqynda Kólik mınıstri Marat Qarabaev Bek Air áýe kompanııasy ushaǵynyń apatqa ushyraýyn tergeý qaıta bastalatyny týraly aıtqan edi.

Eske sala ketsek, 2019 jyldyń 27 jeltoqsanynda Almatydan Astana qalasyna ushyp shyqqan Bek Air kompanııasynyń ushaǵy radardan joǵalyp ketti. 

Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.

Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.