Almaty mańynda 5 myńǵa jýyq abonent kógildir otyn jelisinen ýaqytsha ajyratylady
ALMATY. KAZINFORM – Almaty mańynda 19 qarasha kúni TETs-3-ke deıin tartylyp jatqan jańa gaz qubyryn qosý jumystary júrgiziledi. Bul týraly «QazaqGaz Aimaq» AQ-nyń Almaty óndiristik fılıaly habarlady.
Josparlanǵan jumystarǵa oraı Almaty oblysy Іle aýdanynyń birneshe eldimekenderindegi 4449 abonentke kógildir otyn berý ýaqytsha toqtatylady. Olar:
- Kókterek aýyly
- «Energetık» saıajaı-kooperatıvi
- Baıserke aýyly
- «Proektırovşık» saıajaı-kooperatıvi
- «Nadejda» saıajaı-kooperatıvi.
Sondaı-aq «QazaqGaz Aimaq» AQ Almaty óndiristik fılıaly mamandary qaýipsizdikti qamtamasyz etý úshin turǵyndarǵa jumystar aıaqtalǵanǵa deıin gaz shúmekterin jaýyp qoıýǵa jáne iske qosý sharalary tolyq aıaqtamaıynsha gaz shúmekterin ashpaýǵa keńes berdi.
— Bul - megapolıstiń ekologııalyq ahýalyn jaqsartý maqsatynda TETs-3-tiń tabıǵı gazǵa kóshirilýine baılanysty júrgizilip jatqan keshendi jumystar. Suraqtaryńyz bolsa, 104 nómiri boıynsha gaz qyzmetine habarlasa alasyz. Ýaqytsha keltirilgen qolaısyzdyqtar úshin keshirim suraımyz jáne tutynýshylar tarapynan túsinistikke senim artamyz, - dep habarlady «QazaqGaz Aimaq» AQ Almaty óndiristik fılıalynan.
Eske salaıyq, buǵan deıin Batys Qazaqstan oblysynda gaz óńdeý zaýyty salynatynyn jazǵanbyz.
