Almaty qutqarýshylaryna kúnine 3 myń qońyraý túsedi
ALMATY. KAZINFORM – Almatyda tótenshe jaǵdaılarǵa arnalǵan mobıldi qosymsha ázirlendi.
Bul týraly óńirlik kommýnıkatsııalar qyzmeti uıymdastyrǵan baspasóz týry barysynda Almaty qalasy TJD azamattyq qorǵanys basqarmasynyń bastyǵy Qýanysh Ospanov aıtty.
– Tótenshe jaǵdaılar mınıstriniń tapsyrmasymen «TJ Almaty» mobıldi qosymshasy ázirlendi. Ony App Store men Play Market platformasynan tegin júktep alýǵa bolady. Qosymshada jańalyq, kún raıynyń boljamy, oqytý jadynamasy men beınerolıkter jarııalanady, evakýatsııa kezinde panalaıtyn pýnktterdiń kartasy da sonda ornalasqan, - dedi ol.
Sonymen qatar spıker tótenshe jaǵdaılar departamenttiń negizgi bólimshesi — Josparlaý men jedel basqarý ortalyǵynyń jumysyn túsindirdi. Onyń aıtýynsha, munda kezekshi bólim, jedel kezekshiler, 112 men 101 jelisi ornalasqan.
– Táýligine biz úsh myńnan astam qońyraý qabyldaımyz, onyń ishinde júıe arqyly polıtsııaǵa nemese jedel járdem qyzmetine baǵyttalatyn ótinishter de bar, - dedi Qýanysh Ospanov.
Azamattyq qorǵanys basqarmasynyń bastyǵy qala turǵyndaryn túrli oqys oqıǵalar kezinde jedel qımyldaýǵa daıarlaý jumysy júrgizilip jatqanyn atap ótti. Mysaly, ótken jyly azamattyq qorǵaý salasynda halyqty oqytyp, daıarlaýmen aınalysatyn jańa ortalyq ashylǵan. Ol Raıymbek dańǵyly, 129/147 mekenjaıynda ornalasqan. Onda aýdan ákimderi men olardyń orynbasarlarynan bastap, kásiporyndar men uıymdardyń mamandaryna deıin statsıonarlyq sabaq ótiledi.
Eske salaıyq, buǵan deıin Shymbulaq mańynda qar kóshkini astynda qalǵan adam qutqaryldy.