Almaty qutqarýshylary qoıma ishindegi 300 elektr samokatyn órtten saqtap qaldy
ALMATY. KAZINFORM – 112 pýltine Almaty qalasy, Almaly aýdanyndaǵy Vasnetsov kóshesinde ornalasqan qoımada órt shyqqany týraly habarlama kelip túsken. Qutqarýshylar lıtıı-ıondy batareıalar saqtalǵan qoımada órttiń taralýyna jol bermedi, dep habarlaıdy TJM.
Oqıǵa ornyna kelgen TJM qyzmetkerleri lıtıı-ıondy batareıalardyń janǵanyn anyqtaǵan. Órttiń jaqyn ornalasqan jańa lıtıı-ıondy batareıalar men elektr samokattarǵa taralý qaýpi týyndaǵan.
– Órt sóndirýshiler birden órt oshaǵyn sóndirýge jáne akkýmýlıator batareıalaryn qarqyndy salqyndatýǵa kiristi. Qabyldanǵan sharalardyń arqasynda órttiń ári qaraı taralýyna jol berilgen joq. Órt jarty saǵatqa jetpeıtin ýaqytta tolyq sóndirildi. Zardap shekkender joq, – delingen TJM habarlamasynda.
Órt sóndirýshilerdiń jedel áreketiniń arqasynda 100-den astam lıtıı-ıondy batareıa men 300-ge jýyq jańa elektr samokaty saqtalyp qaldy. Sonymen qatar akkýmýlıatorlardyń birinen keıin biri tutanýyna ákelýi múmkin tizbekti reaktsııanyń aldyn alý múmkin boldy.
– TJM lıtıı-ıondy batareıalar janǵan kezde birinen keıin biri tutanyp, ýly janý ónimderin bólýi múmkin ekenin eskertedi. Mundaı órtterdi sóndirý erekshe tásildi jáne qaıta tutanýdyń aldyn alý úshin uzaq ýaqyt boıy qarqyndy salqyndatýdy qajet etedi, – Almaty qalasy TJD Órt sóndirý qyzmeti jedel kezekshisi Ǵalymjan Espolov.
Eske sala ketsek, buǵan deıin almatylyqtar elektrsamokat erejesin buzǵandar týraly WhatsApp arqyly habarlaı alatyny týraly jazdyq.
