Almaty qutqarýshylary qaýipti taý baǵyttaryn atady
ALMATY. KAZINFORM – Jazǵy ýaqytta qutqarý brıgadalary táýligine 3–4 ret shaqyrtý alady. Bul týraly QR TJM «Respýblıkalyq qutqarý qyzmeti «Barys» RMM qutqarý bólimshesiniń bas qutqarýshysy Pavel Voskoboınıkov aıtty.
Onyń aıtýynsha, daıyndyǵy joq adam úshin taýdaǵy barlyq baǵyttar qaýipti. Týrısterdiń ústine tas túsip, aýa raıy kúrt qubylyp ne adam joldan adasyp ketýi múmkin. Biraq Almaty taýlarynda, ásirese Aıýsaı shatqaly men Kúmbelsý shatqalyna shyǵý kúrdeli.
- Aıýsaı shatqalynda úsh sarqyrama bar. Mundaı ýchaskeden ótý úshin arnaýly jabdyq qajet. Daıyndyǵy joq týrıster ol jaqqa óz betinshe barmaǵany jón. Odan bólek Kúmbelsý shatqaly ótýge kelmeıtin qıyn jer sanalady, – dep eskertti Pavel Voskoboınıkov.
Qqtqarýshy óz múmkindigin asyra baǵalaǵan adamdar taýda qıyndyqqa jıi tap bolatynyn aıtty. Onyń sózinshe, keıbir týrıster gıdpen bir ret jolǵa shyqqannan keıin taýdy jaqsy bilemin dep oılap, óz betinshe kúrdelirek baǵytty tańdaı bastaıdy. Barar jerin muqııat zerttep almaı, tipti qajetti jabdyqty durys tańdamaı jolǵa shyǵyp ketetinder de bar.
- Jolǵa shyqpas buryn marshrýtty muqııat zerttep, týystaryńyzǵa nemese dostaryńyzǵa naqty qaı baǵytpen júretinińizdi habarlaýyńyz kerek. «Taýǵa kettim» degen sóz bolmaıdy: qutqarýshylar kem degende shatqaldyń ataýy men baratyn jerińizdi bilip otyrýy qajet, – dedi ol.
Mekenjaı belgili bolǵanda izdestirý-qutqarý jumystarynyń uzaqtyǵy eki esege qysqarýy múmkin. Eger baǵyt belgisiz bolsa, qutqarýshylarǵa úlken aýmaqty tekserýge týra keledi.
Sondaı-aq jabdyqqa da erekshe kóńil bólý kerek. Taýǵa shyǵarda tobyqty jaýyp, ony túgel qymtap turatyn aıaq kıim tańdaǵan durys. Kún ystyq bolǵan jaǵdaıda mamandar uzyn shalbar, deneni tolyq jabatyn kıim, kúrte men bas kıim alyp júrýge keńes beredi.
Spıker jasóspirimderdiń ata-anasyna da erekshe úndeý jasady. Aıtýynsha, keıingi ýaqytta taýǵa 14–16 jastaǵy kámeletke tolmaǵandar óz betimen jıi baratyn bolǵan.
Eske salaıyq, Almaty mańyndaǵy taýda adasyp ketken eki jasóspirim qutqaryldy.
