Almaty qýyrshaq teatry halyqaralyq festıvalde bas júldeni ıelendi
ALMATY. KAZINFORM – Almaty qýyrshaq teatry Kanadada ótken halyqaralyq teatr festıvaliniń bas júldesin jeńip aldy. Bul týraly teatr dırektory Almat Amangeldi málimdedi.
– 2024 jyl Memlekettik qýyrshaq teatry úshin tarıhı jyl boldy. Kanadada Gran-prı jeńip alǵan teatr qazaqstandyq qýyrshaq óneriniń álemdik moıyndaýǵa laıyq ekenin dáleldedi. Bul jeńis – teatr ujymynyń orasan zor eńbeginiń nátıjesi. Biz ónerimizdiń álemdik deńgeıge kóterilip, qazaqstandyq kórermenderdiń ǵana emes, shetel azamattarynyń da tańdanysyn týdyratynyna qýanyshtymyz, – dep atap ótti Almat Amangeldi.
Aıtýynsha, budan bólek teatr Grýzııadaǵy halyqaralyq festıvalde «Úzdik rejısser» syılyǵyn jeńip aldy. Sondaı-aq, Belarýssııada ótken «Lıalkı nad Nemanom» festıvalinde qazaqstandyq qoıylym arnaıy dıplomǵa ıe boldy.
– Biz Almatynyń álemniń túkpir-túkpirinen keletin eń úzdik qýyrshaq teatrlary bas qosatyn orynǵa aınalǵanyn qalaımyz, – deıdi ol.
Byltyr qýyrshaq teatrynyń repertýary jańa bes qoılymmen tolyqty. Atap aıtar bolsaq, belgili boksshy, olımpıada chempıony Bekzat Sattarhanovtyń batyl rýhyn dáripteıtin «Chempıon», álemge áıgili ertegi jelisimen sahnalanǵan aqyl-parasattyń kúshi jáne dostyq týraly syr shertetin «Etik kıgen mysyq», gúrjistandyq rejısserdiń jetekshiligimen qoıylǵan, qoǵamdaǵy senimsizdik, bozókpelik, býllıng týraly «Shekpen», «Juldyzdy qýyrshaqtar» kontserttik qoıylymy jáne baýyrmaldyq pen meıirimdilik týraly syr shertetin «Qar hanshaıymy» qoıylymy.
– Biz balalar men jasóspirimderge tek kóterińki kóńil kúı syılap qana qoımaı, sondaı-aq mańyzdy ómirlik qundylyqtardy úıretetin spektaklderdi qoıamyz, – dep atap ótti teatr basshysy.
Eske salayq, buǵan deıin Almatydaǵy memlekettik qýyrshaq teatrynda dańqty boksshy, Sıdneı Olımpıadasynyń chempıony Bekzat Sattarhanovqa arnalǵan «Chempıon» qoıylymy sahnalanǵan bolatyn.
Aıta keteıik, bıyl memlekettik qýyrshaq teatry 90 jyldyq mereıtoıyn aýqymdy baǵdarlama boıynsha atap ótpek.