Almaty kitaphanalarynyń mobıldi qosymshasy iske qosyldy
ALMATY. KAZINFORM – Almatyda qalalyq kitaphanalarynyń mobıldi qosymshasy resmı túrde iske qosyldy.
Qosymsha alǵash ret Naýryz merekesine oraı ótken «KitapFest-2026» festıvalinde kópshilik nazaryna usynylǵan. Almaty ákimdiginiń málimetinshe, jańa qosymsha kitaphana qyzmetterin tsıfrlyq formatta yńǵaıly túrde paıdalanýǵa jol ashady.
Endi oqyrmandar oqyrman bıletin onlaın rásimdep, kitap qorymen qashyqtan tanysa alady. Sonymen qatar azamattar ótkiziletin is-sharalar men ádebı jańalyqtar týraly aqparat alyp otyrady. Odan bólek geolokatsııa fýnktsııasy arqyly ózine eń jaqyn kitaphanany ońaı anyqtaı alady.
– Qosymsha arqyly rásimdelgen elektrondyq oqyrman bıleti barlyq fılıalda jaramdy jáne ózin-ózi qyzmet kórsetý qurylǵylarynda qoldanýǵa bolady. Kitaptardy úıge jetkizý qyzmeti de mobıldi qosymsha arqyly qoljetimdi. Bul qyzmet múmkindigi shekteýli azamattarǵa tegin usynylyp, olardyń aqparatqa teń qol jetkizýin qamtamasyz etedi, - dep habarlady ákimdikten.
Bastapqyda tek Android júıesinde qoljetimdi bolǵan servısti 6 sáýirden bastap iOS operatsııalyq júıesin paıdalanýshylar da qoldana alady.
Eske salaıyq, buǵan deıin Almatyda táýlik boıy jumys isteıtin kitaphanalar sany artqanyn jazǵanbyz.