Almaty kireberisinde júk kólikteriniń salmaǵyn ólsheý mehanızmi qalaı jumys isteıtin bolady

Qalalyq jol ınfraqurylymyn damytý basqarmasynyń bólim basshysy Oljas Ahmetovtyń aıtýynsha, Qulja tasjolynda júk kólikteriniń salmaq pen gabarıt parametrlerin avtomatty jáne táýlik boıy tekserip, tirkeıtin avtomattandyrylǵan ólsheý stansalaryn montajdaý jumystary bastaldy.

- Biz bul stansalardy qalanyń kireberis ýchaskelerine, negizinen júk kólikteri kóp júretin baǵyttarǵa ornatýdy josparlap otyrmyz. Bul jabdyq júris bóliginiń ústine arka túrinde ornatylady, onyń ishinde datchıkter bolady. Ol óz kezeginde júk kólikteriniń gabarıtterin anyqtaıdy. Sondaı-aq jol jabynyna iri kólik osteriniń sanyn, dońǵalaqtardyń juptasýyn, kóliktiń salmaǵyn jáne oske túsetin júktemeni anyqtaıtyn datchıkter engizilip jatyr, - dedi ol.

Aıtýynsha, avtomattandyrylǵan ólsheý stansasy ornatylatyn jerde arkaǵa deıingi 100 metr jáne arkadan ótkennen keıingi 100 metr aralyqtaǵy jol jabyny betonnan bolady. Oljas Ahmetov bul qozǵalystaǵy kólik quraldaryn turaqtandyrý úshin, ornatylǵan datchıkterdiń qyzmet etý merzimin uzartý úshin qajet ekenin atap ótti. Odan bólek beton jabyny salmaqtan paıda bolatyn deformatsııaǵa tózimdirek bolmaq.

- Asfaltty beton jabynǵa aýystyrý jumystary aýa raıy jaǵdaıyna baılanysty qarasha aıynyń sońyna deıin jalǵasady, - dep túsindirdi basqarma ókili.

Eske salaıyq, buǵan deıin Almatydaǵy eki tasjolda iri júk kólikterin baqylaý júıeleri ornatylatyny habarlandy. Osyǵan baılanysty 19 qazan men 19 qarasha aralyǵynda Qulja tasjolynyń qala shekarasynan Buqtyrma kóshesine qaraı sozylatyn 200 metrlik ýchaskesinde reversıvti qozǵalys uıymdastyryldy.

Sonymen qatar osy kezeńde Іle tasjolynyń qala shekarasynan Súıinbaı dańǵylyna qaraı baǵyttalǵan 200 metrlik bóliginde de reversıvti qozǵalys engizildi.

Sondaı-aq 2026 jyldyń shilde aıynan bastap saǵat 07:00-den 22:00-ge deıin Saın kóshesi – ál-Farabı dańǵyly – Shyǵys aınalma avtomobıl joly (ShAAJ) – Rysqulov dańǵyly aralyǵynda júk kólikteriniń qozǵalysyna shekteý engizilgen bolatyn.