Almaty qoımalarynda órt faktileri nelikten kóbeıdi

ALMATY. KAZINFORM — Jyl basynan beri Almatyda 5 qoıma órtengen.

Almaty qalasy Tótenshe jaǵdaılar departamentiniń málimetinshe, 2025 jyldyń basynan beri qalada 112 órt faktisi tirkelgen. Onyń 61-i turǵyn úıde, beseýi qoımada, segizi saýda kásiporyndarynda jáne 38-i ózge mekemelerde bolǵan.

Kazinform saýalyna jaýap bergen qalalyq TJD bastyǵy Nurlan Atyǵaev megapolıs qoımalaryndaǵy órt faktileri kóbeıýiniń basty sebebin atady.

— Qoımalardaǵy órttiń negizgi sebepteriniń biri — elektr qaýipsizdigin saqtamaý. Ot elektr jabdyqtaryn durys ornatpaý, sondaı-aq durys qoldanbaý saldarynan bolady. Atap aıtqanda, sýyq kezeńde jylý berý qurylyǵylary belsendi qoldanylyp, elektr jelilerine shamadan tys júk túsedi. Sondaı-aq kóbinese qaraýsyz qalǵan elektr qurylǵylardan jalyn shyǵady, — dedi TJD bastyǵy.

Nurlan Atyǵaev qoımalar táýekeli joǵary obektiler qatarynda ekenin atap ótti. Aıtýynsha, munda úlken kólemde taýarlar saqtalady jáne ol janǵysh materıaldar bolýy múmkin. Sondyqtan órttiń aldyn alý úshin qoıma ıeleri men jalǵa alýshylar birneshe negizgi erejelerdi saqtaýy kerek.

— Qoıma úı-jaılarynyń ıeleri men jalǵa alýshylaryn órt qaýipsizdigi erejelerin saqtaýǵa shaqyramyn. Bul talaptardy buzý ákimshilik jaýapkershilikke, al órt saldarynan adamdar zardap shekse nemese qatty zaqym bolsa, bul qylmystyq jaýapkershilikke ákelýi múmkin. Departament elektr symdaryn únemi tekserip otyrýdy, elektr jabdyqtarynyń aqaýsyz jumys isteý qadaǵalaýdy usynady, — dedi ol.

Jalpy Tótenshe jaǵdaılar departamenti qoımalarda kelesi erejelerdi saqtaýǵa keńes beredi:

— Birinshiden, saqtaý tártibi. Taýarlardy retsiz qaldyrmaý kerek. Sóreler arasynda ótkelder bolýy, al janǵysh materıaldar arnaıy jabdyqtalǵan jerlerde bolýy qajet.

— Ekinshiden, elektr qaýipsizdigi. Ot negizinen elektr symdaryndaǵy qysqa tuıyqtalý áserinen týyndaıdy. Sondyqtan symdar jaramdy kúıde bolýy kerek, al qýatty qurylǵylar uzartqysh symdarsyz jáne elektr jelisine shamadan tys júk túsirmeı qosylý tıis.

— Úshinshisi — ot jaǵýǵa jáne temeki shegýge tyıym salý. Belgilenbegen jerde temeki shegý órttiń týyndaýyna ákelýi múmkin. Taǵy bir mańyzdy másele — qoımada jaramdy, merzimi ótpegen órt sóndirý quraldary, dabyl júıesi jáne avtomattandyrylǵan órt sóndirý júıesi ornatylýy kerek.

Aıta keteıik, búgingi kúni Almaty qalasy Tótenshe jaǵdaılar departamentinde 1606 adam jumys isteıdi, onyń ishinde órt sóndirýshiler sany — 822. Almaty qalasy garnızonynyń órt sóndirý bólimshelerinde 162 tehnıka bar. Jalpy qalanyń 8 aýdanynda 20 órt sóndirý bólimderi ornalasqan.

Eske salaıyq, 2025 jyldyń 8 qańtar kúni Almatynyń Alataý aýdanynda bir qabatty qoıma órtendi. 

Keıin 9 aqpan kúni Túrksib aýdanynda qoımadan órt shyqty. 

16 aqpan kúni Rysqulov dańǵylynda ornalasqan bazar aýmaǵyndaǵy qoımany jalyn sharpydy. 

19 aqpanda Áýezov aýdany Ótegen batyr kóshesiniń boıyndaǵy qoıma otqa orandy.

23 aqpanda Áýezov aýdany Tóle bı kóshesiniń boıyndaǵy qoımadan órt shyqty.