Almaty — Qostanaı baǵytynda jańa «Talgo» poıyzy júredi

ASTANA. KAZINFORM — 2025 jylǵy 16 jeltoqsannan bastap № 119/120 «Almaty — Qostanaı» baǵytyndaǵy jańa «Talgo» poıyzy júre bastaıdy, dep habarlaıdy «Jolaýshylar tasymaly» AQ baspasóz qyzmeti.

Mekeme málimetine sáıkes jańa poıyz jup kúnderi qatynaıdy. Quram zamanaýı «Talgo» vagondarynan tolyq jasaqtalǵan. Bul sheshim poıyzdyń júris ýaqytyn standartty poıyzdarǵa qaraǵanda 12 saǵatqa qysqartýǵa múmkindik beredi.

— Poıyz 600-den astam jolaýshyny tasymaldaı alady. Baǵyt Qostanaı, Tobyl, Atbasar, Astana, Qaraǵandy jáne Almaty sııaqty iri qalalar arqyly ótedi. Baǵytta zamanaýı Talgo vagondary paıdalanylady. Olar sapardyń qaýipsizdigin jáne jol ústindegi jaılylyqty tolyq qamtamasyz etedi. Múmkindigi shekteýli jandar úshin arnaıy beıimdelgen oryndar bólingen, bılet qunyna 50%-ǵa deıin jeńildik qarastyrylǵan. Bul sheshim eldiń ońtústik pen soltústik óńirler arasyndaǵy kólik qoljetimdiligin kúsheıtip, qysqy maýsymda jolaýshylar úshin jol júrýdi edáýir qolaıly etedi, — delingen habarlamada.

Bıletter bilet.railways.kz resmı saıtynda jáne barlyq temirjol vokzaldarynyń bılet kassalarynda qoljetimdi. Poıyzdardyń naqty kelý jáne jóneltý ýaqyty týraly aqparatty https://tablo-railways.kz/ru saıtyndaǵy onlaın-tablo arqyly qaraýǵa múmkindik bar. 

Osydan buryn Astana — Jezqazǵan baǵytyndaǵy Talgo poıyzy Qyzylordaǵa deıin baratynyn jazǵanbyz.