Almaty-Qostanaı baǵytyndaǵy aqaýy bar vagon «Jolaýshylar tasymalyna» tıesili bolyp shyqty

ASTANA. KAZINFORM — Áleýmettik jelilerde Almaty – Qostanaı baǵytyndaǵy jolaýshylar poıyzy vagondarynyń tehnıkalyq jaǵdaıy syn kótermeıtini týraly beınejazba taraǵannan keıin, ulttyq tasymaldaýshy kompanııa — «Jolaýshylar tasymaly» AQ resmı túsinikteme berip, jolaýshylardan keshirim surady.

Buǵan deıin atalǵan poıyzdyń jeke menshik tasymaldaýshyǵa tıesili ekeni aıtylǵan edi. Alaıda kompanııanyń ishki tekserisi barysynda №43 «Qostanaı – Almaty» poıyzy quramynda «Jolaýshylar tasymaly» AQ-na tıesili eki vagonnyń bolǵany anyqtalǵan.

— Bul vagondar tek bir rettik reıs úshin suranys boıynsha tirkelgen. Qazirgi tańda olar poıyz quramynan shyǵaryldy jáne qaıta paıdalanylmaıdy. Jolaýshylarǵa keltirilgen qolaısyzdyqtar úshin keshirim suraımyz, — delingen kompanııa taratqan habarlamada.

Eske sala keteıik, oqıǵaǵa baılanysty Kólik mınıstrligi tasymaldaýshynyń tehnıkalyq talaptardy saqtaýy boıynsha tekseris bastaǵanyn habarlaǵan bolatyn.

— Poıyz baǵytynyń sońǵy pýnktine jetkennen keıin tehnıkalyq tekserý men mán-jaıdy anyqtaý jumystary júrgiziledi. Eger buzýshylyqtar rastalsa, tasymaldaýshy tarapynan kináli tulǵalar jaýapkershilikke tartylady, — dep atap ótti mınıstrlik agenttik saýalyna bergen jaýabynda.

Mınıstrlik sonymen qatar barlyq tasymaldaýshylardan tehnıkalyq reglamentter men qyzmet kórsetý standarttaryn qatań saqtaýdy talap etetinin jáne jolaýshylardyń qaýipsizdigi men jaılylyǵyn qamtamasyz etý baǵytynda júıeli jumys júrgizip jatqanyn málimdedi.