Almaty kóshesinde pyshaq ustap júrgen er adam aýrýhanaǵa jatqyzyldy
ALMATY. KAZINFORM — Almatynyń Bostandyq aýdanynda polıtseıler kóshede pyshaqpen júrgen er adamdy ustady.
Bul jaǵdaı týraly aqparat áleýmettik jelilerde taraǵan edi. Jeli qoladanýshylarynyń biri esepte turatyn azamattyń qolyna pyshaq ustap kóshede júretinin jáne aýdan turǵyndaryna qaýip tóndiretinin jazǵan.
— Búldirgen múlki úshin oǵan eshteńe de istemeıdi, bárin óz esebimizden qalpyna keltirip jatyrmyz. Ol qaqpalardy, kólikterdi qıratady, dóńgelekterdi tesedi. Onyń qamqorshysy da joq, óıtkeni anasy birneshe jyl buryn óte kúmándi jaǵdaıda habar-osharsyz ketken. Qysta jylýsyz, durys kútimsiz ómir súredi. Memlekettik organdardyń nazaryn aýdarý úshin osy jazbany belgileýlerińizdi suraımyn. Vıdeoda ol jol jóndep jatqan balalarǵa tap bergen. Pyshaǵyn qaltasyna jasyryp júrgendikten, ony birden baıqamaı qalǵan, — deıdi Bostandyq aýdanynyń turǵyny.
Almaty qalasy polıtsııa departamenti 30 tamyzda «102» pýltine kóshede pyshaq ustap júrgen er adam týraly habarlama túskenin málimdedi. Oqıǵa ornyna dereý polıtsııa ekıpajy jiberilgen.
— Oqıǵa ornyna jetken qyzmetkerler aqparatty rastap, azamattardyń qaýipsizdigin qamtamasyz etti. Er adam ustalyp, jedel medıtsınalyq járdem brıgadasyna tapsyryldy. Onyń Psıhıkalyq densaýlyq ortalyǵynda esepte turǵany anyqtalyp, keıin mamandandyrylǵan medıtsınalyq mekemege jatqyzyldy, — dep habarlady departamentten.
Eske salaıyq, Talǵarda nan satatyn orynnyń ıesi pyshaq jaraqatynan qaıtys bolǵanyn jazǵanbyz.
