Almaty kósheleriniń birinde jylý qubyryn jóndeý merzimi uzardy

ALMATY. KAZINFORM – Jetisý aýdany Pavlodar kóshesiniń boıynda eki baǵytta jol qozǵalysyn shekteý merzimi taǵy birneshe kúnge uzartyldy.

Jylý jelilerin jańǵyrtýǵa baılanysty Pavlodar kóshesiniń boıynda №136 úıden bastap Maqataev kóshesine deıin eki baǵytta jol qozǵalysy 26 tamyz saǵat 00:00-ge deıin shekteletin bolady. Buǵan deıin atalǵan aýmaqta kólik qozǵalysy 19 tamyz kúngi 12:00-ge deıin jabylady dep habarlanǵan bolatyn.

- Ýaqytsha shekteýler osydan 43 jyl buryn 1981 jyly paıdalanýǵa berilgen, uzyndyǵy 2 myń 135 metr bolatyn avtokólik jolynyń bóliginiń astynan ótetin qubyrdy jańǵyrtý ýchaskesinde josparly jumystardy júrgizý qaýipsizdigin qamtamasyz etý úshin qajet. Ýaqytsha qolaısyzdyqtarǵa túsinistikpen qaraýlaryńyzdy suraımyz, - dep habarlady «Almaty jylý júıesi» JShS.