Almaty kósheleriniń biri 1 aıǵa jabylady
ALMATY. KAZINFORM – Almatynyń Aınamaly kóshesinde ınjenerlik jeliler qurylysyna baılanysty kólik qozǵalysy shekteledi.
Qala ákimdiginiń málimetinshe, Alataý aýdanyndaǵy «Terekti» shaǵyn aýdanynda Aınamaly kóshesinde (Martók kóshesinen Ortalyq kóshesine deıingi aralyqta) sý qubyry men káriz júıesiniń taratý jelilerin salý jumystary júrgizilip jatyr. Sol sebepti 3 maýsym men 3 shilde aralyǵynda atalǵan ýchaskede avtokólik qozǵalysy ýaqytsha shekteledi.
- Júrgizýshiler men júrginshilerden baǵyttaryn aldyn ala josparlap, jol qozǵalysyn uıymdastyrýdaǵy ózgeristerdi eskerý suralady. Qaýipsizdikti qamtamasyz etý úshin ýaqytsha jol belgileri, baǵyttaǵyshtar men qorshaýlar ornatylady, - dep habarlady ákimdikten.
Eske salaıyq, Astanada Saýran kóshesiniń bir bóligi bir aıǵa jabyldy.
